ৱাই খেমচান্দনা লুচিংবা অনৌবা মীয়ামগী লৈঙাক থাজবগী ভোট্টা মায় পাকখ্রে

শীংজমৈ কেন্দ্রগী এম এল এ অমদি মনিপুর লৈঙাক্কি হান্নগী মিনিষ্টর অমসু ওইরম্বতা নত্তনা মনিপুর লেজিসলেটিব এসেমব্লিগী স্পীকর অমসু মমাঙদা ওইরম্লবা য়ূম্নাম খেমচান্দনা লুচিংবা অনৌবা মীয়ামগী এন দি এ লৈঙাক ঙরাং মনিপুর লেজিসলেটিব এসেমব্লিগী ফ্লোরদা থাজবগী ভোৎ লৌনবদা মায় পাকখ্রে।
মহাকপু মনিপুরগী ১৩ শুবা চিফ মিনিষ্টর ওইনা হন্দক ৱাশক লৌখিবা মতূঙ এসেমব্লীগী ফ্লোরদা মহাক্কি লৈঙাক্কি পাঙ্গল চাংয়েং তৌননবা অমদি লৈঙাক অসীগী ওইনা অহানবা এসেমব্লি সেসন পাঙথোক্নবা ষ্টেট অসীগী গভর্নরনা খঙহনখিবগী মতূঙ ইন্না ঙরাং নুংথিল পূং ৪ তাবদা এসেমব্লি গী সেসন ফমখিবনি।চহী অমগী অহানবা মীফম ওইবনা গভর্নরনা মহাক্কি এদ্রেস পূঙ অমা হেন্না পীখি।
মদূগী মতূঙ নুমিদাংৱাইরম পূঙ ৬.২০ ফাওবা হাওসকি মীফম অদূ এদজোর্ন তৌখি। মথং তারকপা মীকূপ্তা খেমচান্দ না লুচিংবা অনৌবা লৈঙাক্কি মপাঙ্গল চাংয়েং তৌননবা থাজবগী ভোৎ লৌনবদা মায় পাকপা ঙমখিবনি।
মনিপুরদা লৈরকখিবা অকনবা হীঙশাগী ঈরাঙ অদূ সেন্টর অমদি ষ্টেট লৈঙাক্না অহীঙ-নুংথিল অনীদা মহৌশাগী শক্তম হঞ্জিলহনবা ঙম্ননবা লেপ্তনা হোৎনরকখিবগী মহয় না ঙসীদি তপ্না-তপ্না মহৌশাগী পুন্সিদা লাক্লে,শান্তি হঞ্জিল্লক্লি হায়না গভর্নরনা মহাক্কি এদ্রেস পীবদা ফোঙদোকখি।চীঙ অমসুং তম্পাক্কি মফমশিংদা লৈরম্বা বঙ্কর ৫৪৯ থুগাইবা ঙমখ্রে, নোংমৈ ৭৩১৩, নোংমৈ মরূ ৮৩,৫১২ অমদি এক্সপ্লোসিব ৫১৯৫ রিকোভর তৌবা ঙম্লে লোয়ননা মীয়ামদগী অরানবা মওংদা শেনখাই-থুমখাই চত্থরম্বা মীওই ৯২৪ সু ফাগৎপা ঙমখ্রে হায়বা ৱাফমশিং গভর্নরনা ফোঙদোরকখি। মসীগা লোয়ননা এসেমব্লিগী মীফমদু মতম কক্তনা য়ৈথোক্লে হায়না লাউথোকখি।