মতম কয়াগী মমাঙদগী তোঙান তোঙানবা মখোয়গী দাবীশিং তান্দুনা লাক্লিবা ভিল্লেজ দিফেন্স ফোর্স ( ভি দি এফ) শিংনা মনিপুরগী মফম কয়াদা হনবা লৈতনা ৱাকৎ খোঙজঙ চত্থরক্লি। থৌবাল, বিষ্ণুপুর, ককচীঙ নচিংবা দিষ্ট্রিক্টশিংদা লৈরিবা ভি দি এফ লীশিং হেনবনা মখোয়গী তোঙান তোঙানবা দাবীশিং তকশীন্দুনা ৱাকৎ মীফম কয়ামরুম চত্থখ্রবা মতূঙদা ঙরাংসু ইম্ফাল ইষ্ট দিষ্ট্রিক্টকি ভিদিএফ ৱেলফ্যের এসোসিয়েসনগী থৌমীশিংনা কোংবা থোং ওলা লম্পাক্তা ভিদিএফশিংগী অচৌবা ৱাকৎ মীফম অমা পাঙথোক্তুনা মখোয়গী দাবীশিং তকশীনখ্রে।
ৱাকৎ মীফম অদুদা শরুক য়াখিবা এসোসিয়েসনগী ভাইস প্রেসিদেন্ট কে এস ঐচ জোন মৈতৈনা ফোঙদোকখিবা মতূঙ ইন্না,ভি দি এফশিং অসীগী সার্বিস রিগুলারাইজ তৌবিয়ু, ইন্দিয়ান পুলিস এক্ট,১৮৬১ গী সেক্সন ১৮ গী মখাদা ভি দি এফ কি সার্বিস অসী ইমপ্লিমেন্ট তৌগদবনি অদূগা অহীঙ -নুংথিল নাইদনা মীয়াম অমদি লৈবাক্কি সেবা তৌরিবি ভি দি এফ শিং অসীগী হৌজিক ফংলিবা ওনরেরিয়ম অসী মতমগা চূনবা চাংদা হেঙ্গৎকদবনি হায়বা ৱাফম ফোঙদোকখি।
মখোয়গী দিমান্দ অসী চৎলিবা জনুৱারী থা অসীগী ১৫ ফাওবগী মনূঙদা পীথোক্তবা তারবদি মথঙগী নুমিৎ জনুৱারী ১৬ তা মনিপুরগী গভর্নর ফম্লিবা লোক ভবনগী গেৎতা মীয়াম্না মহৌশা অমূক্তা উখিদ্রিবা মখলগী খোঙজঙ চঙশীনগনি হায়খি।
