উশানা য়ুবী লাকপী ২০২৫ শৌগৎলি; য়েলহৌ মশান্নশিংগীদমক লেপ্লিবা খোঙফম চেৎশিনহল্লি 

ভারতকী মাংজিল থাবা কঞ্জ্যুমর দ্যুরেবল ব্রান্দশিংগী মনুংদা অমা ওইরিবা উশা ইন্তরনেস্নেলনা হন্দক মনিপুরগী ইম্ফাল ইস্ত দিস্ত্রিক্তকী নোংপোক শঞ্জেনবমগী কম্বোহপুৎ লম্পাক্তা নুমিৎ নিনি চুপ্না পাঙথোকখিবা য়ুবী লাকপী ইন্দিজিনস স্পোর্তস ফেস্তিবেল ২০২৫ তা ঙাক্লৌ পীখি। মৈতৈ-পাঙ্গলনা হৌদোকখিবা য়ুবী লাকপী মশান্ন অসিগী মমিংগী ৱাহন্থোক্তি য়ুবী লাক্তুনা শান্নবা হায়বনি অমদি ফুতবোলগী মতৌগুম্না নাকল অমদা শান্নরোয় তরেৎ-তরেৎনা বোলগী মহুত্তা য়ুবী শীজিন্নরগা শান্নবনি। লমদমদুগী শান্ন-খোৎনবগী লুপশিং অমদি মীয়ামগী লুচিংবশিংগা খুৎশম্নরগা পাঙথোকখিবা থৌরম অদুদা শান্নরোয় ২০০ হেনবনা শরুক য়াদুনা খোঙজেল, পাঙ্গল, অমদি মনিপুরগী ইনাক খুল্লবা নাৎকী লনগী নীংথিরবা শক্তমশিং উবা ফংখি। চহি অসিগী কম্পিতিসন অসিদা কাঙলুপ খুদিংদা তোপ-তোপ্পা পর্ফোর্মেন্সশিং উবা ফংখি। এস.কে.দি.সি.না চেম্পিয়নগী তাইতল লৌখি অদুগা হৈনৌবোক তীম্না নক্ননা ইন্নদুনা রন্নর অপ তাখি। মাইবম খুমনলাকপগী শিংথানিংঙাই ওইরবা খুৎশান্ননা মহাকপু বেস্ত পর্ফোর্মর এৱার্দ ফংহনখিবগা লোয়ননা মাইবম খুমনলাকপনা বেস্ত স্পারিং (চাইনবা) প্লেয়র ফংখি অদুগা ফেয়র প্লে এৱার্দনা বি.আর.ৱাই.ও. তীম-বিনা ফংখি। ওফিসিএল স্পোর্তস পার্ত্নর ওইনা উশানা মীপুম তিংনা শরুক য়াহন্নবা পান্দমদা স্পোর্তস কিত অমদি এৱ্যারনেসকী মচাকশিং য়েন্থোকপগী মথক্তা ইন্তরেক্তিব স্কিল জোন, দিমোন্সত্রেসন, ৱর্কসোপ, অমদি কম্ম্যুনিতী আউতরীচ য়াওনা থবক থৌরম কয়া লমজিংদুনা পাঙথোকখি।

থৌশিল অসিগী মতাঙদা ৱা ঙাংলদুনা, মিস কোমল মেহরা, হেদ- স্পোর্তস ইনিসিএতিব এন্দ এসোসিএসন, উশা ইন্তরনেস্নেলনা হায়খি, “য়ুবী লাকপীগুম্বা ফুরুপকী মশান্নশিং অসি মনিপুরগী খুন্নাই-নাৎকী ফিজলগী শরুক্নি। শান্নরোয়শিংনা উৎখিবা লম্বা লৈত্রবা মথৌনা অমদি খোঙফমশিং লোয়ননা লমদমদুগী মীয়াম্না মপুং ফানা শরুক য়াখিবা অসিনা য়েলহৌ মশান্নশিংনা পারী পুরীনা থম্বিরম্বা লন ওইবখক্তা নত্তনা মশা মউ হেন্না ফবা অমদি মতিং লৈবা পুন্সি মহিং অমা পুরক্নবা মচাক অমা করিগীদমক ওইরিবনো হায়বদু তাক্লি। শান্ন-খোৎনবনা চৎনবী অমদি তুংলমচৎপু শমজিন্নহল্লি, অমদি অসিগুম্বা থৌশিলশিংদা ঙাক্লৌ পীবা হায়বসি থম্লিবা মীৎয়েঙ অসিগী মহৌশাগী ওইবা মচৎনি হায়না ঐখোয়না থাজৈ।”

১৫-ৱাঙ্খৈ এসেমব্লী কন্সতিতুএন্সীকী এম.এল.এ. শ্রী অরুনকুমার থাংজমনা থৌরম অদুদা অথোয়বা মীথুং ওইনা শরুক য়াখিবগা লোয়ননা, লম্লাই এসেমব্লী কন্সতিতুএন্সীগী এম.এল.এ. শ্রী খোংবান্তাবম ইবোমচানা থৌরম মপু ওইখি। ইরোম ইবোমচা মৈতৈ, মাইচৌ তোনয়াইমবা থাঙ-তা স্কোলার অমদি মুক্নাগী ইন্তরনেস্নেল প্লেয়র, শ্রী মোইরাংথেম নিংথেম মৈতৈ, প্রধান তখেল গ্রাম পঞ্চায়ত, শ্রী সাইকত নাস্কর, রিজনেল মেনেজর, উশা ইন্তরনেস্নেল, অমদি শ্রী তি.ঐচ. বিরমঙ্গোল সিংহ, সেক্রেতরী পীপল্স দিভেলপমেন্ত সোসাইতী অমদি উশা ইন্তরনেস্নেল অমসুং লমদমদুগী শান্ন-খোৎনবগী লূপশিংগী মীহুৎশিংসু ইকায়খুম্নরবা মীথুং ওইনা শরুক য়াখি। নুমিদাংৱাইরমদা পাঙথোকখিবা মনা মথুম য়েন্থোকপগী থৌরমদা মকোক মথং তাখ্রবশিংবু ত্রোফী, মেদল, অমদি সর্তিফিকেৎশিং অথোয়বা মীথুং, থৌরম মপু, ইকায়খুম্নরবা মীথুংশিংনা মথঙশিৎনা লান্থোক্তুনা তরাম্না ওকখি। থৌরমদুদা ৱা ঙাংলদুনা, ইরোম ইবোমচা মৈতৈ (মাইচৌ তোনয়াইমবা, শক্নাইরবা থাঙ-তাগী ওজা, অমদি মুক্নাগী ইন্তরনেস্নেল প্লেয়র)না হায়খি, “য়ুবী লাকপী: হায়বসি অচম্বা মশান্না অমা নত্তে, মসিনা মনিপুরগী মশক তাক্লিবা থৌনা, চৎনবী অমদি ফুরুপশিংগী মহুৎ শিল্লিবনি। চহি অসিগী য়ুবী লাকপীগী থৌরম অসিদা মীয়াম্না মপুং ফানা শৌগৎপিবা অসিগীদমক ঐখোয় তশেংনা নুংঙাই। শরুক য়াখিবশিং অমদি মীৎয়েঙ তাখিবশিংগী পামজবা মতৌ অমদি পুক্নিং মথুম মরাং হৌবনা য়েলহৌ মশান্নশিংবু নাৎ অমদি শান্ন-খোৎনবগী মরক্তা থোং ওইনা থম্বগী মরুওইবা অদু নৌহৌননা তাক্লি।