লমদম অসীগী তুংগী মীরোল কন্ননবা লৈঙাক্না পায়খৎলিবা থবক থৌরমশিং অসিদা মীয়াম্না সপ্পোর্ট তৌশিনবা মথৌ তাই। পায়খৎলিবা থবক থৌরমশিং অসিদা লাল্লি, অশোয়বা লৈরে হায়রবদি তাকপীয়ু, চুমথোক্ননবা হোৎনজগে হায়না চিফ মিনিষ্টর নোংথোম্বম ফিরেন্না ফোঙদোকখ্রে।
ইম্ফালদা নুতিগী ফোঙবা পোক্নফম পাউচেগী চহী ৫০ শুরকপা গোল্ডন জুবিলি থৌরমদা অথোয়বা মীথূংলেনগী ৱারোলদা চিফ মিনিষ্টর না ৱাফম অসী ফোঙদোকখিবনি। জৱাহরলাল নেহরু মনিপুর দান্স একাদেমিদা পাঙথোকখিবা থৌরম অদূদা চিফ মিনিষ্টর না মখা তারদুনা হায়, মহাক্না পোলিটিক্সতা চঙলক্ট্রিঙৈ মমাঙদা পাউমী অমা ওইরমখি। মতমদূদা মহাক্না কোয়না চত্তুনা মীয়ামগী অৱা-অনা, শেল থুমগী ফীভমগী মতাঙদা এদিটোরিয়েল কলমশিংদা ইদুনা লাকখি। পাউমীশিংনা ঈরমদম অসী চাওখৎহনবদা য়াম্না অচৌবা থৌদাং লৌদুনা লাক্লিবনি হায়খি।
লমদম অসীগী শোকচিল্লক্লিবা ফীভমশিং অসী ফগৎহন্দবা য়াদে হায়বা ৱাখল্লোন মাঙদা থম্লগা মহাক্না পোলিটিক্সতা খোঙদারকখিবনি হায়না চিফ মিনিষ্টর না ফোঙদোকখি।