তাইরেনপোকপী অমদি ন্যু কৈথেলমানবীগী লৈহৌরিবা ঈমূঙশিং চয়োল অসীদা হান্নগী মফমশিংদা হলহন্নবা থৌরাং পায়খৎলি:দি সি

হৌখিবা কুমশিং ২০২৩ গী মে অহুমদগী চিন-কুকি নার্কো- টেরোরিষ্টশিংনা মৈতৈ কম্যুনিটিগী মথক্তা হীঙশাগী ঈরাং চত্থদুনা লৈরকখিবদগী ময়ূম মকৈনচিংবা মৈ থাদোকখিবদগী লাঞ্জেন্নরক্তুনা রিলিফ কেম্পশিংদা ঙসীফাওবা চঙজফম লৌদুনা লৈরকলিবা ইন্টরনেল্লি দিসপ্লেস পার্সন (আই দি পি) শিংগী ওইনা মশা-মশাগী হান্নগী লৈফম খুঙ্গংশিংদা অমূক হঞ্জিলহন্দুনা মহৌশাগুম অমুকহন্না খুন্দা-লৈতাহন্ননবা ষ্টেট অমসুং সেন্টর লৈঙাক্না অকনবা থবক পায়খৎলক্লি।
থৌওং অসীগী মনূঙ চন্না ইম্ফাল নোংচুপ পানাগী মনুঙদা লৈরিবা তাইরেনপোকপী অমসুং ন্যু কৈথেলমানবী খুঙ্গংশিংদগী লাঞ্জেন্নরক্তুনা রিলিফ কেম্পশিংদা ঙসীফাওবা চঙজফম লৌদুনা লৈরকলিবা আই দি পিশিং চৎলিবা চয়োল অসীগী মনূঙদা মশা-মশাগী হান্না লৈরম্বা মফমশিংদা হঞ্জিলহন্ননবা লৈঙাক্না অকনবা থবক পায়খৎলক্লি। খুঙ্গং অনী অসীগী অয়াম্বা খুঞ্জাশিংদি মতম খরগী মতাঙদা মশা-মশাগী য়ূমশিংদা হান্ননা হঞ্জিলহনখ্রবনি। লেমহৌরিবা ঈমূঙশিং চয়োল অসীগী মনূঙদা হঞ্জিলহনবা য়াননবা দিষ্ট্রিক্ট এদমিনিষ্ট্রেসন্না অকনবা থবক পায়খৎলি হায়না ইম্ফাল নোংচুপ পানাগী দিপ্যুটি কম্মিস্নার ময়াংলম্বম রাজকুমারনা ফোঙদোকখ্রে।

আই দি পিশিং নৌনা মশা-মশাগী য়ূমশিংদা হঞ্জিলহন্ননবা লৈঙাক্কি মায়কৈদগী লৌখৎলিবা থবক থৌরমশিং কদায় ফাওবা খূমাঙ চাওশীল্লবগে হায়বগী মতাঙদা ঙরাং দি সি অসীনা লুচিংবা টিম অমনা পাঙথোকখিবা খোঙচৎ মনূঙদা রাজকুমারনা ৱাফম অসী ফোঙদোরকখিবনি। রিলিফ কেম্পতা লৈরিঙৈদা মখোয়না ফংলম্বা রেসন অমসুং অতৈ মখলগী খুদোংচাবা পূম্নমক ঈমূঙশিং অসীনা মশাগী ময়ূমদা হঞ্জিনখ্রবা মতূঙদসু মখা তানা অদুম্মক ফংখিগনি হায়খি। শেনফম খরা খরসু পীগনি অদুগা মখোয়না ঈশীংগী, মৈগী অমসুং অতৈ দরকার লৈগদবা পূম্নমক দিপার্টমেন্টশিংনা পীননবা হৌজিক ফিট্টিং তৌবগী থবকশিং পায়খৎলি হায়খি।