হৌখিবা এপ্রিল ১৮ দা কাংচুপ এরিয়া প্রোটেক্সন এন্দ দেভলপমেন্ট কম্মিটি কৌবা শেমজিন- শাজিনবা অমসুং কুকি কম্যুনিটিগী টোপ সোসিয়েল বোদি ওইরিবা কুকি ইনপীগী য়ুনিট অমনি হায়জবা লূপ অমনা চৎলিবা থা অসীগী ৩০ দা কুকি মীয়ামগী ওইবা মীফম অমা পাঙথোক্কনি হায়না নোটিস অমা থাদোরকপগা লোয়ননা কাংপোকপি দিষ্ট্রিক্ট তা লৈরিবা মনিপুর পুলিস, মনিপুর রাইফলস অমসুং ইন্দিয়া রিজার্ব বট্টালিয়নদা লৈরিবা ফূরূপ অসীগী পার্সনেলশিংনা শরুক য়াগদবনি হায়রক্লিবদু ইনবা য়ারোই হায়না দিষ্ট্রিক্ট পুলিসকি এস পিনা ফোঙদোকখ্রে।
ৱাফম অসী ফোঙদোক্লদুনা চৎলিবা থা অসীগী ২১ দা কাংপোকপী দিষ্ট্রিক্ট পুলিসকি এস পিনা কাউন্তর-নোটিস অমা ইস্যু তৌরদুনা, দিষ্ট্রিক্ট অসিগী মনূঙচন্না লৈরিবা মনিপুর পুলিস, মনিপুর রাইফলস অমসুং আই আর বি পার্সনেল অমত্তনা কম্যুনিটিগী অখূবা ৱাখল্লোন্দা পুশিল্লক্তুনা অসীগুম্বা ওইদা-পাদবা, কম্যুনেল ওইবা প্রোপেগন্দা অসীদা শৌগৎপা, মীফমদা শরুক য়াবনচিংবা অমত্তা য়ারোই হায়না অকনবা ৱাফম খঙহনখি।
কনাগুম্বা পার্সনেলশিংনা অসীগুম্বা মীফমশিংদা য়াওশীল্লম্বা তারবদি মদুদা মনিপুর লৈঙাক অমদি ষ্টেট পুলিস অথোরিটিনা য়াম্না হকচীন্না লৌগনি হায়খি। থৌওং অদু চত্থরম্বা তারবদি গ্ৰোস সর্বিস মিসকন্দক্ট চত্থবনি হায়না লৌবগা লোয়ননা মতীকচাবা দিসসিপ্লিনারি এক্সন লৌগনি হায়না ফোঙদোকখি।