মনিপুর লৈঙাক্না হন্দক নৌনা ওর্দর অমা থোক্তুনা দিষ্ট্রিক্ট পুলিসকি সুপরিন্টেন্দেন্ট ( এস পি) অনী য়াওনা পুলিস অফিসার ১৪ নৌনা ট্রান্সফর তৌখ্রে। ষ্টেট লৈঙাক্কি দিপার্টমেন্ট ওফ পার্সনেল এন্দ এদমিনিষ্ট্রেটিব রিফোর্মস না থোকখিবা ট্রান্সফর ওর্দর অদুদা জিরিবাম দিষ্ট্রিক্ট পুলিসকি এস পি শৈখ মোহম্মদ জাকিরনা ককচীঙগী এস পি ওইনা, ককচীঙগী এস পি ওইনা লৈরিবী প্রিয়াদর্সিনি লাইশ্রম্বু জিরিবাম দিষ্ট্রিক্ট পুলিসকি এস পি ওইনা ট্রান্সফর তৌরকখিবনি।
ককচীঙ দিষ্ট্রিক্ট পুলিসকি এস পি প্রিয়াদর্সিনি লাইশ্রম্বু জিরিবাম দিষ্ট্রিক্ট পুলিসকি এস পি ওইনা ট্রান্সফর তৌরকপগী থৌওংদু খম থেংনা য়ানিংদবা ফোঙদোরকপগা লোয়ননা দিষ্ট্রিক্ট অসীগী মীয়াম হৌরক্তুনা মনিপুরগী গভর্নরদা ট্রান্সফর ওর্দর অদূ খূদক্তা ষ্টে তৌবিয়ু হায়না মেমোরেন্দম অমা রাজ ভবন্দা চত্তুনা পীশীনখ্রে। জিরিবাম দিষ্ট্রিক্ট পুলিস কি এস পি জাকির ককচীঙদা থাজিল্লকপা য়ারোই, প্রিয়াদর্সিনি লাইশ্রম্বু জিরিবাম দিষ্ট্রিক্ট তা ট্রান্সফর তৌবসু য়ারোই হায়না ককচীঙ বজার বোর্দ, ককচীঙ কৈথেল ঈমা লূপ অমসুং ককচীঙ অপূনবা নূপী লূপকি মেম্বরশিংনা গভর্নরদা মেমোরেন্দম পীশীনখি।
ককচীঙগী এস পিশিং অসী ঙাইহাক লৈতনা শিন্দোক-শিঞ্জিন তৌমনবদগী মীয়ামগী চাওখৎ- থৌরাংগী থবক অমত্তা মপূঙফানা পায়খৎপা ঙমদ্রে। পুলিস অমসুং মীয়ামগী মরক্তা নকশীন্ননা, অফবা মরী শাগত্তুনা থবক চঙশীনমিন্নবা অমত্তা ঙমহন্দ্রে। প্রিয়াদর্সিনি লাইশ্রম অসীসু ককচীঙদা লাকপা থা অনীফাওবা ফাদ্রিবনি। মীয়াম্না মহাকপু ওক্তুনা শকখঙ-মায়খঙননবা থৌরাং তৌরিঙৈ চৈরক্তা মথোঙ হূক্তবা ট্রান্সফর ওর্দর থোক্লক্লিবসি মীয়াম্না কৈদৌনূংদা য়াবা ঙম্লোই হায়না মীয়াম অদুনা ফোঙদোকখি।