শিল্লোংদা লৈবা মনিপুরগী রাজবারি উফুল তানা থুগাইখিবগী থৌওং য়াম্না লাইবক থীবনি: এন বিরেন

মনিপুরগী পুৱারিগা কৈদৌনুংদা তৎন- থানবা য়াররোইদবা, মনীঙতম্বা লৈপাক অমা ওইনা খা- নোংপোক এসিয়াদা চহী লীশীং মরি হেনবগী নিংথৌ পানবা পুৱারি লৈরকখি হায়বগী অহীংবা খূদম-চাংদম অমসু ওইরিবা শিল্লোংদা লৈবা মনিপুরগী রাজবারি হৌখিবা ওক্টোবর মাপন্দা ঊফূল তানা থুগাইখিবগী থৌওং অসী অকনবা মওংদা কন্দেম তৌই, মসিদা চেন্নরিবশিং অকনবা চৈরাক পীগদবনি হায়না মনিপুরগী হান্নগী চিফ মিনিষ্টর নোংথোম্বম বিরেন্না ফোঙদোকখ্রে।
চৎলিবা ওক্তোবর থা অসীগী ১৪ দা ন্যু দিল্লিদগী ইম্ফালদা হল্লকখিবা এন বিরেন্না ইম্ফালগী বির টিকেন্দ্রজিৎ ইন্টর্নেস্নেল এয়রপোর্ট তা পাউমীশিংগা উনখিবা থৌরম অমদা হায়, কুমশিং ২০১৭ তা মহাক্না মনিপুরগী চিফ মিনিষ্টর ওইনা মীয়ামগী থৌগল তৌবা হৌরক্লবা মতমদু ফাওবা শিল্লোংদা লৈবা রাজবারি অসি মনিপুর লৈঙাক্না মপূ অমা ওইবগী থবক-থৌরম অমত্তা লৌখৎলমদে। মহাক্না ওফিসিয়েল টিম অমা পুদুনা মফম অসীগী হান্নদগী লৈজরক্লবা শক্তম কায়হন্দনা থম্ননবা অমদি মসীগী অহাঙবা এরিয়াগী শরুক্তা মনিপুরিশিংগী মীথূঙশঙ অমা শাননবা থবক পায়খৎনবা থৌরাং তৌরকখিবনি। মনিপুরগী অশেংবা পুৱারি নাথৈহন্ননবা থৌরাং অসিগী মায়োক্তা ঐখোয়না অকনবা থবক পায়খৎকদবনি হায়না মহাক্না ফোঙদোকখি।
ৱাঙ্গোই এ সিগী এম এল এ ওইরিবা কে ঐচ লোকেন্নসু শিল্লোংদা লৈবা মনিপুরগী রাজবারিগী ফীভম হকথেংননা য়েংশিনখিবগা লোয়ননা থম্মোয় শোক্না পেন্দবা অমসুং অশাওবা ৱাফম কয়া ফোঙদোকখি।চৈরকশিদা, খূরায় এ সিগী এম এল এ লৈশাংথেম সুসিন্দ্রোনা মনিপুরগী গভর্নর অজয় কুমার ভাল্লাদা মেমোরেন্দম অমা পীশীন্দুনা রাজবারি থুগাইখিবগী মতাঙদা থিগৎপিদুনা চৈরাক পীননবা তকশীনখ্রে।