খেত্রিগাউ কেন্দ্রগী এম এল এ শৈখ নুরুল হাসননা নেস্নেল পিপলস পার্টি (এন পি পি) গী ৱার্কিং প্রসিদেন্ট ওইরে। এন পি পি লেজিসলেচর পার্টিগী লুচিংবা ওইনা লৈরগনি হায়রি।
চৎলিবা ফেব্রুয়ারি থা অসিগী মঙাদা সিল্লোংদা পার্টি অসিগী প্রসিদেন্ট কোনরাদ কে সংমানা ওর্দর অমা থোক্তুনা, হন্দক তদূবী কেন্দ্রগী এম এল এ অমসুং এন পি পি ষ্টেট য়ুনিটকি প্রসিদেন্ট ওইরম্বনা খঙহৌদনা লৈখিদবা মতূঙদা মনিপুরগী ওইনা পার্টি অসীগী য়ুনিট প্রসিদেন্ট অমা হাপত্রিঙৈ চৈরকসিদা মনিপুর লৈঙাক্কি হান্না দিপ্যুটি চিফ মিনিষ্টরসু ওইরম্লবা য়ূম্নাম জয়কুমারবু ইন্টরিম প্রসিদেন্টকি থৌ পুহনখি। মদূগী মতূঙ তারকপদা ইন্টরিম প্রসিদেন্ট না শৈখ নুরুল হাসন এম এল এবু পার্টি অসীগী ষ্টেট য়ুনিটকি ৱার্কিং প্রসিদেন্ট ওইনা হাপখিবনি।
মহাক্কি হৈথোই-শিংথোইবা লৌশিং অমসুং ইন্নোভেসনগী মতীক-মগুন কয়াদুনা পার্টি অসীগী মপাঙ্গল হেন্না কনখৎহন্দুনা মনিপুরদা এন পি পি মরা চেৎশীলহনবা ঙমগনি হায়বগী অচেৎপা থাজবা কয়া নেস্নেল অমসুং ষ্টেট য়ুনিটকি লিদরশিংগী পূক্নিংদা ফাওনরি। মহাক্না পার্টি অসিবু লমদমসিদা হেন্না পাকথোক-চাউথোকহনগনিহায়বগী থাজবসু লৈ হায়রি।