লমদম অসিদা মচীন তুমখৎলক্লিবা প্রাইভেট মেদিকেল ইন্সটিটিউট অমা ওইরিবা, ইম্ফাল ইষ্ট দিষ্ট্রিক্ট কি খেত্রিগাউ কেন্দ্রগী মনূঙচন্না তোপ মোইরাংকম্পু মখা লৈকায় মনাক্কি য়ারল পাত্তা লৈরিবা সাইনা ইন্সটিটিউট ওফ মেদিকেল সাইন্সেস (সিমস) তা নৌনা মহৈ তম্লকপা নর্সিং জি এন এম, অমসুং পেরা মেদিকেলগী হীরমদা ইন্সটিটিউট অসীদা তম্লিবা মহৈরোয়শিংগী কেপ্পিং, ওথ টেক্কিং সিরেমোনিগা লোয়ননা নৌনা চঙলকপশিং পূন্না শকখঙ-মায়খঙনবগী থৌরম অমা ঙরাং পাঙথোকখ্রে।
কলচরেল প্রোগ্রাম কয়ানা মথেল ওইদুনা মপূঙফানা পাঙথোকখিবা ওথ টেক্কিং থৌরমদু হৌদোকপদা মেদিকেল ইন্সটিটিউট অসীগী মেনেজিং দিরেক্তর কম সেক্রেটরি অমসুং ইন্টর্নেস্নেল এৱার্দি সুর্জিটকুমার ( এস কে) মঙাঙ, ইন্সটিটিউট অসীগী এদ্দিস্নেল দিরেক্তর- কম- নোদেল ওফিসার এস কে ৱাজিদ, সিমসকি চিফ এদভাইজর অমসুং নহারোলগী থৌদাং পাউচেগী এদিটর খোইরোম লোয়ালাকপা, ট্রেন নর্সেস এসোসিয়েসন ওফ ইন্দিয়া, মনিপুর ষ্টেট ব্রাঞ্চকি প্রসিদেন্ট অমসুং নেস্নেল এৱার্দি এন তাঙবী অমসুং অম্মোকোক কি প্রসিদেন্ট ওইনা লৈরিবা এস এম জলাননচিংবা শক্নায়রবা মীওইশিংনা দাইজ মেম্বর ওইনা শরূক য়ারদুনা ৱা ঙাঙখি।
ইন্সটিটিউট অসীদা তম্লিবা মেদিকেল মহৈরোয়শিংনা অখাঙ কনবগা লোয়ননা থকশী-খাশি ঙাক্তুনা মশা-মশাগী মহৈদা পূক্নীঙ চঙনা হোৎনদূনা মী অমমম ওইননবা অমসুং মীওইবা খুন্নাইগী সেবাদা মিংচৎ পুরক্ননবা হোৎনসি হায়না অথোয়বা মীথূঙলেনগী ৱারোলদা লোয়ালাকপনা ফোঙদোকখি।