সাইকোৎ কেন্দ্রগী এম এল এ পাউলিয়েনলালগী মথক্তা আইনগী চৈরাক পীফম থোকই: সঞ্জয় অহন্থেম

মনিপুরদা থোক্লিবা থা ১৯ শুরক্লবা ঈরাং অসীদা মালেমদা অমূক্তা ফাওবা মমাঙদা থোকখিদ্রিবা থৌদোক অমা ওইনা রিলিফ কেম্পতা লাঞ্জেন্নরক্তুনা লৈরবা মতূংদা পোকপা, সুপ্নগী থা ৮ খক্তা ঙায়রিবা অঙাঙ য়াওনা অঙাঙ অহুমগা থারগা নূপী অহুমগা পূন্না মরাল লৈজদ্রবা মীওই তরুক জিরিবামগী বোরোবেক্রা পুলিস ষ্টেসন মনূংচন্না লৈরিবা জাকুরাধোরদগী কুকি-মার কাঙলূপকি মিলিটেন্টশিং না ফাদুনা পুখ্রগা তমথীনা হাৎখিবা থৌদোক অসী নুমিৎ-থানা লৈরিমখৈ কাউঙমদনা লৈহৌরগনি, খ্বায়দগী তমথীবা, মীওইবনা চৎনদবা শাগী লীচৎ অমনি হায়না ২৯- কুম্বি কেন্দ্রদা হৌখিবা ১২ শুবা মনিপুর লেজিসলেটিব এসেমব্লিগী মীখলদা জে দি য়ূগী টিকেট্টা কেন্দ্র অসীদা মীরেপ ওইখিবা সঞ্জয় অহন্থেমনা ফোঙদোরক্লি।

কুম্বি কেন্দ্রগী মনূংচনবা লৌবূক অমদা থবক শুদুনা লৈজবী, পীক্লিবা অঙাঙ অহূমগী মমা অমসু ওইরিবি সাপম সোফিয়া কৌবী মৌ নহা অমবু কুকি মিলিটেন্টশিং না তমথীবা মওংদা নোংমৈনা কাপ্তুনা হাৎখিবা, কৌত্রুকতা মৌ নহা অমা হাৎখিবা অদুগা হন্দক নবেম্বর ১১ দসু নুংথিল পোবোপ্তা জিরিবামগী জাকুরাধোরদা মৈতৈগী য়ূম, দুকান কয়ামরুম মৈ থারমখিবা থৌদোক অদুদা অহল অনী হাৎখিবা থৌদোকশিং অসীদা প্রাইম মিনিষ্টর নরেন্দ্র মোদিনা নুঙাইতবা, অৱাবা ফোঙদোকপগী ষ্টেটমেন্ট অমফাওবা ফোঙদোরকখিদবসি য়াম্না লাইবক থীবা অমনি হায়না মহাক্না ফোঙদোকখি।

জিরিবামগী লাইবক থীবা থৌদোক অদু চুম্নগী লম্মন খুম্বা অমনি হায়না উশীত্তবা ৱাঙাঙ ফোঙদোরকখিবা সাইকোৎ কেন্দ্রগী বি জে পিগী এম এল এ পাউলিয়েনলাল হাওকিপ অসীগী মথক্তা বি জে পি অমসুং ষ্টেট হোম দিপার্টমেন্ট না অকনবা আইনগী থবক লৌখৎফম থোকপনি হায়নসু মহাক্না ফোঙদোরক্লি।