প্রোক্সি ৱার চত্থরকপনি হায়বা ময়েক শেংলে, ইন্ডিয়ান আর্মীনা কুকি টেরোরিষ্টশিং ফোংনা শৌগৎলি হায়বা খঙলে: খুঞ্জাশিং

মনিপুরদা হৌজিক থোক্লিবা থা ১৯ মপূঙ ফারক্লবা, কুকি-জো নার্কো টেরোরিষ্ট শিংনা চত্থরক্লিবা হীংশা অসী ইন্দিয়া গভর্নমেন্টনা ইন্সীন্দুনা চত্থরকপা প্রোক্সি ৱার অমনি হায়বসি নোংমা নোংমগী ময়েক শেংবা হেঙ্গৎলক্লে। কুকি মিলিটেন্ট শিংনা মৈতৈ খুঞ্জাশিংদা বোম, নোংমৈ কাপ্তুনা মী শোকপা-শিবা য়াওরবফাওবদা ইন্ডিয়ান আর্মীগী মহার রেজিমেন্টকি কাঙবূ অমনা মিলিটেন্টশিং অসীদা নোংমৈ মরূ অমফাওবা কাপ্তুনা খূৎ হনখিদবতা নত্তনা টেরোরিষ্টশিং অদূবু থেংনদুনা তকথোক্ননবা চঙশীল্লকখিবা মনিপুর পুলিশ কম্মান্দো তোংলকপা কেস্পর গারিশিংফাওবা আর্মীনা মখোয়গী কেস্পর গারিশিং লম্বীদা ফৈজিন্দুনা কম্মান্দোশিং চৎহন্দনবা হোৎনরকখিবা থৌওং অসীনা ইন্দিয়াগী ফিরেপ ঙসীদি চপ চানা মনিপুর মীয়াম্না খঙবা ঙম্লে হায়না সনাশাবী, থম্নাপোকপী, য়াইঙংপোকপী অমসুং সবুংখোক মায়কৈগী ঈমাশিংনা তশেং তশেংনা ফোঙদোকখ্রে।

ঙরাং অয়ূক ইম্ফাল ইষ্ট দিষ্ট্রিক্ট কি লম্লাই কেন্দ্রগী মনূংদা লৈবা সনাশাবী, য়াইঙংপোকপী, থম্নাপোকপী অমসুং সবুংখোক এরিয়াশিংদা কুকি-নার্কো টেরোরিষ্ট শিংনা বোম, নোংমৈ কাপশীন্দুনা লান্দারকপদা আর্মীনা কেস্পর গারীশিং য়াইঙংপোকপী থোংখোংগী ইমান্যুয়েল স্কুল মনাক্কি লম্বীদা ফৈগাক ফৈজিন্দুনা মনিপুর পুলিশ কম্মান্দো তোংলকপা কেস্পর গারীশিং থিংদুনা থমখিবগী থৌওং চত্থখিবদু ঈমাশিংনা ঈন্থোক্তুনা চৎহনখি।

মদূগী তুংদা কম্মান্দোশিংগী কেস্পর গারীশিং অদূ চৎহনখি। আর্মীনা চত্থরকখিবা থৌওং য়াম্না পেন্দে। মীয়ামগী পুন্সি অমসুং লন-থুম ঙাক-  শেন্ননবনি হায়দুনা লাক্লগা টেরোরিষ্ট শৌগৎলিবা ইন্দিয়াগী সেন্ট্রেল ফোর্স পূম্নমক মনিপুরদগী হনবিখ্রো হায়না ঈমাশিংনা অকনবা খোল্লাউশিং লাউখি। ইন্দিয়া গভর্নমেন্টনা ঙসীফাওবদা মনিপুরগী হীংশা অসীগা মরী লৈননা শান্নরিবা মরৌ লৈবা থোক লিলা ঙসীদি মনিপুরগী মীয়াম্না ময়েক শেংনা খঙবা ঙম্লে হায়না ঈমাশিংনা অকনবা খোল্লাউশিং লাউখি।