পূকচেল শেংনা, লায়রবা মীয়ামগী য়েংলগা থবক তৌরবদি খুন্নাইগী চাওখৎপা পুরকপা ঙমগনি: এল তোম্বা

লমদম অসিদা লৈমিন্নরিবা তোঙান তোঙানবা ফূরূপকি ঈরৈচা খূদীঙমক্না ঐখোয় মশেল কৈদৌনূংদা শেত্তোক্নবা, খাইদোক্নবা য়াররোইদবনি, ঈচীল-ঈনাওনি হায়বসি খঙনা শোত্থহৌরবা লায়রবশিংবু পূন্না শৌগৎমিন্নবগী ৱাখল্লোন্দা থবক তৌমিন্নরবদি ঐখোয়গী খুনাই অসী মাঙলোমদা, চাওখৎ-লম্বীদা খোঙ থাংজিনবা ঙমগনি হায়না সোসিয়ল ৱার্কর এল তোম্বনা ফোঙদোকখ্রে।
মহাক মশামকসু য়াম্না চম্না, লায়রবা ঈমূঙদগী মচীন-মনাও নিপানগা লোয়ননা ইম্ফাল ইষ্ট দিষ্ট্রিক্টকি খূরায় কোংপাল খাইদেম লৈকায়দা চাউরকপনি হায়না ফোঙদোরকপগা লোয়ননা মচীন-মনাও ৮ গী মনূংদা অনী লৈখিদ্রে, অপোকপা অমসুং অপোকপীনচিংবসু ঙম্নমক লৈখিদ্রে হায়বা ৱাফম ফোঙদোক্তুনা, অহল ওইরবা ঈমা-ঈপাশিংবু ঐখোয়না মীৎনা উবা লাইমক্নি খল্লগা লুনা-চান্না নীঙজগদবনি, মখোয়গী সেবা নীঙথীনা তৌগদবনি হায়খি।
সরকারগী কর্মচারিশিং, থোইদোক হেন্দোক্না তুংগী মীরোল শেম্বগী থবক তৌরিবা ওজাশিংনা মশাখক্কি মরন্নাইগী অপীকপা ৱাখল থাদোক্তুনা খুন্নাই অসীগী হ্যুমেন রিসোর্স শেমগৎপদা ঐগী-মীগী হায়বা নাইদনা থম্মোয় শেংনা, কত্থোকপা অমগা লোয়ননা থবক তৌবিয়ু হায়না সোসিয়ল ৱার্কর অসীনা আপিল তৌরক্লি।মীয়ামগী য়াইফনবা পূকচেল তিংনা থবক তৌরম্বা মহাত্মা গান্ধী, নেতা ইরাবোত অমদি বির টিকেন্দ্রজিৎ নচিংবা অথৌবশিংবু ঐখোয়না ঙসীফাওবা কাউঙমদনা ঈরাৎ-পুজা তৌনরিবনি।মরম অদুনা, শিবদা পুবসু য়ারোইদবা লন-থুম খরগীদমক মিনুংশি লৈতনা,মীগী মীত্তগী পি তাহল্লগা, ঐগী খুদোং চাহৌরগা লোইরে খন্দুনা নম্ফূ তৌদুনা মীগী মরল-মথুম লৌথোক্কে খল্লোইদবনি হায়বা ৱাফম মহাক্না থমখি।
লৈঙাক্নসু মীয়ামগী য়েংলগা মতম শাংনা শেম্বীদনা লৈরক্লিবা ঈথৈ-লৌখোংগী, ঈরম-নালা, লম্বী-থোং কয়া অসী শেম্বিননবা, মীয়ামগী অৱাবা কোকহনবিনবা তোম্বনা মরী লৈনবা খূদীংমক্তা আপিল তৌরক্লি।
এন জি ওশিংনসু মশাগী শেন্দোংখক্কি ৱাখল থাদোক্তুনা খুন্নাই অসীগী য়াইফনবা মীৎয়েং থম্লগা থবক তৌফম থোকই। খুন্নাইগী ৱাখলনা মাঙদা থম্লগা থবক তৌদ্রবদি এন জি ও অমনি হায়না ক্লেইম তৌবা য়াফম থোক্তে, ৱাহন্থোক লৈতে হায়না মহাক্না মখা তাখি।