প্লাষ্টিক পোল্যুসন্না মীওইবদা পীরক্লিবা তমথিরবা চৈথেং অসীদগী ঙাকথোক্নবা মতম চানা হোৎনহৌবা মথৌ তারে: সোমোর্জিৎ

মালেম লৈকোয়পূঙ অসীদা ঙসীদি অমূক্তং শীজিন্নরগা লোইবা সিঙ্গল য়ূজ প্লাষ্টিক্কি অরেমখাক ময়াম অসী ঐখোয় মীওইবনা শীজিন্নরবা মতূঙদা নীঙথীজনা খোমজীন-তাশীন্দুনা থম্লবা মতূঙদা রি-সাইকল তৌননবা হোৎনবগী মহুত্তা তুরেল, পূখ্রী, পাৎ অমদি অহাঙবা লমজাউশিংদা লংথোক্তুনা থম্বদগী ঙসীদি মীওইবা অমসুং অতৈ থৱায় পানবা জিবশিংগী পুন্সিদা খ্বাইদগী শাথীনা খুদোংচাহন্দবা, অমাঙবা কয়া থোকহল্লক্লি।

থৌওং অসীনা ঐখোয়গী মহৌশাগী খলদা, অকোয়বগী শক্তমদা অকিবা ফংনা শোকচীল্লক্লিবা কয়া অসীদগী ঐখোয়না ৱাখল খন্থরগা, কোক চূঙশীন্নদুনা ঙাকথোক্নবা থবক পায়খৎহৌবগী মতমদু হেন্দোকখিগদৌরে, য়াম্না মিপাইনিঙায় মশক ওইরক্লে হায়না দেমোক্রেটিক ষ্টুদেন্স এল্লাইন্স ওফ মনিপুর (দেসাম) গী প্রসিদেন্ট ময়েংবম সোমোর্জিৎনা অকনবা চেকশীল ৱারোল থমখ্রে।

দেসাম্না শীন্দুনা হৌখিবা জূন ২২ দা পাঙথোকখিবা অনীশুবা ষ্টেট লেভেল এনভাইরনমেন্টেল ক্বিজ কম্পিটিসন-২০২৫ দা মকোক-মথঙ তারবা অমদি কন্সোলেসন প্রাইজ ফংলগদবা মহৈরোয়শিংদা চৎলিবা জুলাই থা অসীগী ২৬ তা মনা-মথুম য়েন্থোকখিবা থৌরমদা সোমোর্জিৎনা ৱাফম অসী ফোঙদোকখিবনি।
তাকয়েলদা লৈবা কিন্দরগার্টেন মোন্টেশ্বরি স্কুলগী কনফরেন্স হোলদা পাঙথোকখিবা থৌরমদুদা, ঙসীগী হৌরক্লিবা নহারোলশিংদা সিঙ্গল য়ুজ প্লাষ্টিকশিং মফম চাদনা লংথোক্তুনা মাঙহনবনা মীওইবা অমদি শা, ঙা, উচেকশিংদা পীরক্লিবা চৈথেঙশিংগী মরমদা এৱের্নেস মপূঙফানা পীদুনা মালেম অসীদা লৈরিবা থৱায় পানবশিং কলহৌনবা হোৎনহৌরসি লোয়ননা মালেমগী অঈঙ- আশাগী খল ঙাক্ননবা হোৎনহৌসি হায়খি।