ষ্টেট লৈঙাক অসীনা মীয়ামদা অফবা, ট্রান্সপারেন্সি লৈবা সাসন অমা ফংহন্ননবা হোৎনদুনা লাক্লি। হেন্না অফবা লৈঙাক- সাসন অমা থম্ননবা হোৎনবদা মীয়াম্না মতেং পাংবিয়ু হায়না ষ্টেট লৈঙাক অসীগী এনভাইরোনমেন্ট এন্দ ক্লাইমেট চেঞ্জ মিনিষ্টর থোঙাম বিশ্বজিৎনা ফোঙদোকখ্রে।
ষ্টেট লৈঙাক অসীগী এনভাইরোনমেন্ট এন্দ ক্লাইমেট চেঞ্জ দিপার্টমেন্ট না শীন্দুনা ঙরাং দিপার্টমেন্ট অসীগী পোরোম্পাৎতা লৈরিবা হেদ ওফিষ্টা চহীগী অনৌবা কেলেন্দর ফোঙবা থৌরমদা অথোয়বা মীথুংলেন ওইনা শরুক য়াখিবা মিনিষ্টরনা ৱাফম অসী ফোঙদোকখিবনি। মিনিষ্টরনা হায়, মালেমগী হোংলক্লিবা অঈঙ- অশাগী ফীভম অসীনা ঐখোয় মীওইবা অমসুং অচৎ- চত্ত, লেঙলি-পাল্লিবা থৱায় পানবা জিবা খূদিংমক্তা অচৌবা চৈথেং পীরক্লি। দিপার্টমেন্ট ওফ ক্লাইমেট চেঞ্জনা অঈঙ- অশাগী হোংলক্লিবা খলশিং অসীদগী কন্ননবা থবক থৌরম কয়াসু পায়খৎলক্লি হায়খি।
মীয়াম্নসু মফম খূদিংদা উপাল-ৱাপাল থাবা, য়োকখৎপা অমসুং ঙাক্তুনা থম্বগী হৈনবী শেমগৎপিয়ু হায়না মিনিষ্টর না আপিল তৌখি। এনভাইরোনমেন্ট কেলেন্দর অসী হৌখিবা কুমশিং ২০১৩ দগী চহী খূদিংদা লেপ্তনা ফোঙলক্লি। ষ্টেট অসীখক্কি নত্তনা মালেমগী ওইনা হোংলক্লিবা ঈশীং নুংশিৎকি ফীভম্না মীওইবদা পীরক্লিবা চৈথেং মীয়ামদা খঙহনবা তঙায় ফদে। হীরমশিং অসীদা সধারন মীয়ামদা ভাব তাহন্ননবা পাক-সন্না এৱেরনেস প্রোগ্রামশিং পাঙথোক্ননবা মহাক্কি দিপার্টমেন্টনা হোৎনরগনি হায়খি।