ন্যু কৈথেলমানবীগী খুঞ্জাশিং মশা-মশাগী হান্নগী ময়ূমশিংদা হঞ্জিনবা হৌরে, দি সিনা য়েংশিনখ্রে

হৌখিবা কুমশিং ২০২৩ গী মে অহুমদগী হৌরকখিবা হীঙশাগী ঈরাঙ অসীনা মরম ওইদুনা ময়ূম-মকৈ মৈনা তুম্না চাকখিবদগী লাঞ্জেন্নরক্তুনা ইম্ফাল নোংচুপ পানাগী ৱিসদম পেলেস স্কুলদা চঙজফম লৌদুনা লৈরকখিবা দিষ্ট্রিক্ট অসীগী ন্যু কৈথেলমানবী খুঙ্গংগী ঈমূঙ-মনূঙগী মীওইশিং থা অসীগী ২৩ দগী মশা- মশাগী হান্নগী ময়ূমশিংদা হঞ্জিনবা হৌখ্রে।

মমাঙদসু ঈমূঙ খরদি হঞ্জিন্দুনা লৈনবা য়াওখ্রবনি। মখোয়না অমূক হন্না মশাগী হান্নগী ময়ূমশিংদা চঙদূনা লৈরুনবা য়ূম-কৈ শেংদোকপা, লম-তু লূ- নান্না থম্নবগী থবকশিং তোঙান তোঙানবা দিপার্টমেন্টশিংগী ষ্টাফ, ওফিসিয়েলশিংনা চত্থরিবশিং অদূ দিষ্ট্রিক্ট অসীগী দিপ্যুটি কম্মিস্নার ময়াঙলম্বম রাজকুমারনা হকথেঙননা চত্তুনা য়েংশিনখ্রে ।
দি সিগী খোঙচৎ অদুদা দিপার্টমেন্টশিংগী হেদশিং, সেক্যুরিটি ফোর্স কি মকোকথোংবা ওফিসারশিং অমসুং আই দি পিশিংসু শরূক য়াখি।

ওক্রম কেশোর্জিৎ কৌবা আই দি পি অমনা ফোঙদোরকপা মতূঙ ইন্না, দি সিগী মীৎয়েং মখাদা ন্যু কৈথেলমানবীগী খুঞ্জাশিংনা হান্না লৈনরম্বা য়ূমশিং অমসুং খুঙ্গংগী মনুঙ, অকোয়বা মফমশিং তোঙান তোঙানবা দিপার্টমেন্টশিংগী ষ্টাফ কয়ানা শীৎ-শেংদোকপিদুনা লূ- নান্না থম্ননবা অকনবা থবকশিং পায়খৎলক্লি। আই দি পিশিংনা হান্নগী লৈফমশিংদা চঙশীন্দুনা লৈবদা অৱাবা, খুদোংচাদবশিং থোক্তনবা রিলিফ কেম্পশিংদা লৈরিঙৈদা ফংলম্বা রেসন, অতৈ থক্না-চাননবা পোৎলমশিং, মৈ-ঈশীংনচিংবা মখাতানা পীগনি হায়না দি সিনা থাজবা পীরে হায়খি। কুকি খুলগা নক্ননা লৈবা মরম্না মনিপুর পুলিস অমসুং সেন্ট্রেল সেক্যুরিটি ফোর্সকি কম্বাইন টিম অমসু মখোয়বু ঙাক-শেন্দুনা লৈহনগনি হায়বগী থাজবা দিসিনা পীবদগী খুঞ্জাশিংনা মফম অদুদা হঞ্জিনবনি হায়খি।