হৌগৎলক্লিবা লমদম অসীগী নহারোলশিংনা লৌউ- শীঙউবগী হীরমদা থৱায় য়াওশীন্দুনা চীঞ্জাক্তা মীপাল তাঙদবা লমদম অমা ওইহন্ননবা হোৎনরসি হায়না মনিপুর লৈঙাক্কি এগ্ৰিকলচর লোয়শঙগী দিরেক্তর পিটর সলাম্না ফোঙদোকখ্রে।ঙরাং ইম্ফাল নোংচূপ পানাগী মনূঙচন্না লৈরিবা কোন্থৌজম কাঙজৈবূঙ কম্যুনিটি হোলদা পাঙথোকখিবা নোংমগী ওইবা দিস্কোর্স কম এৱার্নেস প্রোগ্রামদা অথোয়বা মীথূঙলেন ওইনা শরুক য়ারদুনা ৱা ঙাঙবদা মহাক্না ৱাফম অসী ফোঙদোকখিবনি।
ওল মনিপুর প্রোগ্ৰেসিব ফার্মর্স এসোসিয়েসন অমসুং অরম্বাই তেঙ্গোল য়ুনিট-১৪ অনীনা খূৎশম্ন দুনা পাঙথোকখিবা থৌরমদুগী থিম্না রোল ওফ য়ূথস ইন সস্তেনিং এগ্ৰিকলচর হায়বসিনি। থৌরমদুদা পিটরনা মখা তানা হায়, চহী খূদীঙগী ষ্টেট লৈঙাক্কি মায়কৈদগী ঐখোয়গী লৌমীশিংদা লৌউ- পান্থা মতমদা হার অমসুং অফবা মখলগী ফৌদিনচিংবা ফংহন্ননবা হোৎনদুনা লাক্লি।
হন্দক্কি চহী অসীগী ওইনসু হার মরাঙ কায়না ফংহন্ননবা থৌরাং তৌরি। মনিপুরদা লৌ উনরিবা অপূনবা লৌফম হেক্তর লাখ অমরোম হেনবগী মনূঙদা দব্বল ক্রোপ্পিং তৌরিবা লৌফমশিংদি শুপ্নখক্তগী হেক্তর লীশিং মঙারোমদনি। দব্বল ক্রোপ্পিং তৌবা লৌফমশিংগী মশীঙ হেঙ্গৎহনবা মথৌ তাই হায়না মহাক্না ফোঙদোকখি।মনিপুরগী চাকহাও অসী মালেমগী মীয়াম্না য়াম্না পাম্নরিবনি। মীয়ামগী দিমান্দ য়াম্না লৈরিবা মনিপুরগী চাকহাও মখল অসী দব্বল ক্রোপ্পিং তৌদুনা মরাঙ কায়না পুথোকপা ঙম্লবদি শেল থুমগী ফিভম ফগৎহনবসু ঈরায় লায়না ঙমগনি হায়খি।