মৈরা পায়বীগী ঈহৌ হৌদোকখিবগী ৪৫ শুবা কুম্মোন থৌরম পাঙথোকখ্রে

মনিপুরদা অদূঙৈ কুমশিং ১৯৮০ গী দিসেম্বর ২৯ দা অহানবা ওইনা খূত্তা মৈরা পায়রগা থোক্নরকখিবা নূপীশিংনা ইন্দিয়ান আর্মীগী মখূত্তগী মীচম অহূমগী পুন্সি কলহৌখিবা থৌদোক অদুদগী লৌরগা চহী খূদীঙগী মৈরা পায়বীগী নুমিৎ পালন তৌদুনা লাক্লি। চৎলিবা চহী অসীগী ওইনসু ঙরাং নুমিৎ অদুবু নীঙশীংদুনা মৈরা পায়বীগী নুমিৎ, ইম্ফাল ৱেষ্ট দিস্ট্রিক্টকি ফূম্লৌদা লৈরিবা ওল ফূম্লৌ কম্যুনিটি হোলদা ৪৫ রক শুবা মৈরা পায়বী নুমিৎ থৌরম পাঙথোকখ্রে।

ওল মনিপুর ৱিমেন্স সোসিয়েল রিফোর্মেসন্স এন্দ দেভলপমেন্ট সমাজ (নূপী সমাজ) না শীন্দূনা পাঙথোকখিবা থৌরমদুদা লূপ অসিগী প্রসিদেন্ট ওইরিবী ঈমা থোকচোম রমনিনা হায়, তঙদূ-লৈতাফম খঙদ্রবা,মমা পোক্তবি অমসুং পোক্তবা মপানা নাউকোনবগা পাঙ্খক ওইরবা ঙসীগী মনিপুরগী মীয়াম অসী হৌজিক লৈরিবা এম এল এ ৬০ অসীনা অমূক্তং খোমজীন-তাশীন্দুনা মহৌশাগী নুংশি-চানবা শক্তমদু হঞ্জিলহল্লম্মু।অশোয়বা-অরানবা কয়ামরুম কম্যুনিটি শিংগী মরক্তা লৈরম্লবসু কাউথোক্নদুনা ঈং-তপ্পা লমদম অমা ওইহনবিরম্মু হায়বা ৱাফম থমখি।

অপূনবা মনিপুর কনবা নূপী লূপকি প্রসিদেন্ট ওইনা থৌ পুরিবি ঈমা লৌরেম্বম ঙানবিনা,মৈরা পায়বী লূপশিং অসীগী অচূম্বা ফিরেপ অমসুং ৱাখল্লোন্দি অচূম্বা,অশেংবগীদমক লেপ্পা হায়বসিনি হায়খি। অদূঙৈ কুমশিং ১৯৮০ গী দিসেম্বর ২৯ দা ইম্ফাল ৱেষ্ট দিস্ট্রিক্টকি হৈরাঙ্গোইথোং মখা মাইবম লৈকায়দা মীচম অহুম ফাদুনা পুখিবদা মৈরা পায়বী ঈমাশিং থোক্লক্তুনা মীওই অহুম অদূবু কলহৌখিবনি।ঙসীফাওবা নুমিৎ অদুবু লৌরগা চহী খূদীঙগী মৈরা পায়বীশিংগী নুমিৎ পালন তৌদুনা লাক্লিবনি।