ম্যান্মারদগী চঙশীল্লকপা লৈতে, খূৎলায় পুশিল্লকপসু লৈতে হায়রিবসিনা চুম্লবদি কুকিনা পায়রিবা অফবা মখলগী খূৎলায়শিং অসী কনানা পীবনো: ৱাই কে ধিরেন

ইন্দিয়ান আর্মীগী চিফনা হন্দক য়াম্না শেরান্নরবা ৱাফম খরা ফোঙদোরক্তুনা মীয়ামদা চমম্নবা পোকহল্লক্লিবা অসীনা তাকপদি ইন্দিয়াগী সেক্যুরিটি এজেন্সিশিং অসীনা মনিপুরগী পুৱারি মুন্না মশক খঙদ্রি, লমদমশিগী ঈরাং অসীগী মরমদা নৈনবা ৱাৎলি, করিমত্তা খঙবা ঙমদ্রি হায়বনি। সেক্যুরিটি এদভাইজর কুলদিপনা হন্দক্তা ইনৌ নৌনা ওফিসিয়েল ওইনা লাউথোক্তুনা মনিপুরদা খূৎলায় মতীকচানা পায়রবা কুকি মিলিটেন্ট ৯০০ চঙশীল্লকখ্রে, দ্রোন বোম্বিং এত্তেক চত্থরকপা অমসুং মিসাইল রোকেট এত্তেক চত্থরক্লবা মরম্না থৌদোকশিং অসী এন আই এ দা শিন্নরগনি হায়না ফোঙদোকখ্রবা মতূংদা মনিপুরদা থোক্লিবা কনফ্লিক্ট অসীগী মরমদা করিসু খঙদবা ইন্দিয়াগী চিফ ওফ আর্মিনি হায়বা অমনা কুকি- মিলিটেন্টশিংনা দ্রোন শীজিন্নদুনা বোম থাদরকখিবা অমত্তা লৈতে, ম্যান্মারদগী খূৎলায় পায়বা মিলিটেন্টশিং চঙশীল্লকপা লৈতে হায়রক্লিবসি য়াম্না চাউনা মীনম্বা অমনি হায়না য়ুনাইটেদ কম্মিটি মনিপুর (য়ু সি এম) গী প্রসিদেন্ট ওইনা লৈরিবা ৱাই কে ধিরেন্না ফোঙদোকখ্রে।

ম্যান্মারদগী খূৎলায় পায়বা কুকি- মিলিটেন্টশিং চঙশীল্লকপা লৈতে হায়বা তারবদি হৌজিক মনিপুরদা লৈরিবা কুকি- মিলিটেন্ট শিংনা পায়রিবা অফবা মখলগী নোংমৈ-বোমশিং অসী কনানা সপ্লাই তৌরিবনো হায়বদুসু মহাক্না মনিপুর অমসুং মালেমগী মীয়ামদা শেংদোক্কদবনি হায়না ধিরেন্না অকনবা দিমান্দ তৌখি।

কুলদিপনা অমা হায়রি অদুগা চিফ ওফ আর্মিনা অমা হায়দুনা লৈরি। মখোয়না ঙাইহাক ঙাইহাক্কি পঙঙাঙ ঙাঙদুনা মনিপুরদা প্রোক্সি ৱার চত্থদুনা লৈরিবসি অশোয়বা য়াওরে খঙজরবনিনা মখোয়গী পোলিসী হোংদোকফম থোকপনি, নত্রবদি মনিপুরনা মরোমদোম ফিরেপ অমা লৌরকপা য়াই হায়খি।