ম্যান্মার মিলিটেন্টশিং কংগ্রেস পার্টিনা সূ সাইন তৌনরম্বনি হায়না জে পি নাদ্দানা হায়রবনিনা বি জে পিনা সূ অদূ হন্দোক্তুনা ম্যান্মারিশিং হলহনখিবদা করি কায়বগে : তোম্বী

মতম অমদা কংগ্রেস পার্টিনা, ম্যান্মারদগী চঙশীল্লকখিবা মিলিটেন্টশিংগা সস্পেন্সন ওফ ওপরেসন (সূ) খূৎয়েক পীনরম্বদগী মনিপুরদা ঈরাং থোকহল্লিবনি হায়না ভার্টিয়া জনটা পার্টি (বি জে পি) গী নেস্নেল প্রসিদেন্ট জগৎ প্রকাশ নাদ্দা (জে পি নাদ্দা) না হায়রবনিনা হৌজিক সেন্টর অমসুং ষ্টেট অনীমক্তা বি জে পি না লুচিংবা লৈঙাক লাকখিবসু ফনা কুইরে, অদূ ওইরবদি করিগীদমক ম্যান্মারদগী চঙশীল্লকখিবা মিলিটেন্টশিংগা আইনগী ৱাংমদা তৌনখিবা সূ এগ্রিমেন্ট অদূ হন্দোক্তুনা ম্যান্মারিশিং মরমদমদা বি জে পি না দিপোর্ট তৌদ্রিবনো হায়না সিব সেনা মনিপুর য়ুনিটকি প্রসিদেন্ট দা. মোইরাংথেম তোম্বীনা অকনবা ৱাফম ফোঙদোকখ্রে।

ইম্ফালগী বাবুপারাদা লৈবা সিব সেনা গী ওফিস্তা পাঙথোকখিবা পাউমীশিংগা উনখিবা থৌরম অমদা মহাক্না ৱাফম অসী ফোঙদোরকখিবনি। দা. তোম্বীনা মখা তারদুনা হায়, মনিপুর লৈঙাক্তা য়াওদুনা ষ্টেট এসেমব্লিগী মেম্বরশিং ওইদুনা অমদি মিনিষ্টর ফাওবা ওইদুনা লৈরিবা কুকি- জো কাঙলূপকি এম এল এ মিনিষ্টর তরা অসীনা মখোয়গী ওইবা, কুকি- জোগী তোঙানবা লৈপাক অমা মনিপুরদগী শেগায়রগা শেম্লগে হায়না লৈবাক কায়বা য়াবা, মনিপুর অমসুং ইন্দিয়াগী অপূনবা শক্তম কায়হন্ননবা হোৎনরক্লবফাওবা ষ্টেট এসেমব্লিগী স্পিকর অমসুং লৈঙাক অসীনা মখোয় ১০ গী মথক্তা আইনগী ওইবা এক্সন অমত্তা লৌখৎপা লৈত্রিবসি লাইবক থীবনি।

মখোয় ১০বু ঙসিফাওবা তোলোব পীরগা থম্লিবা অসীগী করি ৱাহন্থোক লৈরিবগে হায়খি। সাইকোৎ কেন্দ্রগী বি জে পি এম এল এ পাউলিয়েনলাল হাওকিপনা হৌজিক থোক্লিবা থা ১৯ শুরক্লবা কাঙলূপকি ঈরাং অসী হেন্না লুশিনহনবা য়াবা ৱাফম ফোঙদোক্লফাওবা লৈঙাক অসিনা হৌজিক ফাওবা মহাক্কি মথক্তা আইনগী ওইবা এক্সন অমত্তা লৌখৎপা লৈত্রিবসি করিগীনো হায়নসু তোম্বীনা হংখি।