ইম্ফাল নোংচূপ পানাগী মনূঙচনবা মফমশিংগী লম্বী পরীং, লম্বীগী নাকলদা পৈশিন্দুনা অমসুং চাইখাইদুনা লৈরিবা য়ূম- কৈ, বিল্ডিংনচিংবা থুগাইখিবগী নত্রগা নৌনা শাগৎনবা পান্দমদা থম্লিবা নূঙতেক, নূঙকূপ, নূঙজাওশিং, চ্যেকতেক- লৈঙোয়নচিংবা কয়ানা সধারন মীয়ামগী লম্বী চৎথোক- চৎশীন্দা মতম শাংনা অপনবা অমদি খুদোংচাহন্দবা কয়া থোকহন্দুনা লাক্লি।
পানা অসীগী তোঙান-তোঙানবা লম্বী ময়ায় অমসুং মতাইগী শরুকশিংদা অসীগুম্বা অতেক- অকায় কয়ামরুম পৈখত্তুনা মতম কুইনা থমজিনবদগী লম্বীদা গারি অচৌবা, গারী মচা অমদি খোঙনা অম্মম-অথেঙগী মতমদা চৎলিবশিংদা ঙাইহাক লৈতনা লম্বীগী এক্সিদেন্ট থোক্তুনা অশোক- অপন কয়া য়াওহনবগী মথক্তা কা হেন্না মীওইবদা হেল্থ হাজার্দ কি ফীভম মায়োক্নরগা লৈরে হায়না দিষ্ট্রিক্ট অসীগী দেপ্যুটি কম্মিস্নারগী ৱার্নিংগা লোয়নবা নোটিফিকেসন অমদা খঙহল্লক্লি।
হন্দক দিষ্ট্রিক্ট অসীগী দেপ্যুটি কম্মিস্নারনা নোটিফিকেসন নম্বর দি সি ( আই দব্লিয়ু) /৮/৬/ ইভিক্সন/২০২৫ হায়বা অমা থোক্তুনা লম্বীদা অসীগুম্বা কন্সট্রক্সন মেটরিয়েলশিং পৈশিন্দুনা থম্লিবা মীওইশিংদা অকনবা ৱার্নিংগা লোয়ননা চৎলিবা জুলাই থা অসীগী ১১ গী নুংথিল পূঙ ৩ তাবা মতমদু ফাওবগী মনূঙদা অতেক- অকায়শিং, নূঙ- লৈঙোইনচিংবা কন্সট্রক্সন মেটরিয়েলশিং অসী মশা- মশানা খঙনা লৌথোকখিগদবনি হায়না মরী লৈনবশিংদা খঙহনখ্রে। দি সিগী ওর্দর অসী থৌশাদনা লৈরম্বা খূদীঙমক্কি অফা-ফত্তগী তেকচাক পূম্নমক মশা- মশানা পুজগদবনি হায়রক্লি লোয়ননা মখাতানা মতম পীবা তৌদনা পুলিস অথোরিটিগী মতেং লৌদুনা অসীগুম্বা মেটরিয়েলশিং অসী তকথোকখ্রগনি হায়রক্লি।
