মীতোপ হান্না খন্দোক্লবা মতূঙদা দেলিমিটেসনগী থবক পায়খৎশী: তোম্বি

সুপ্রিম কোর্ট না মনিপুরদা থা অহূমগী মনূঙদা দেলিমিটেসনগী থবক-থৌরম পূম্নমক মপূঙফানা লোইশিনগদবনি হায়না ওর্দর ইস্যু তৌরকখিবা অসী তরাম্না ওকই তৌবতবু মনিপুরদা আইন কায়না চঙশীল্লক্তুনা লৈরিবা মীতোপ- মীয়ানচা ময়াম অসী হান্না মশক খঙদোক্তুনা মরমদমদা হলহনখ্রবা মতূঙদা দেলিমিটেসনগী থবক থৌরমশিং চত্থগদবনি। মসিগা মরী লৈনবা থবকশিং হান্না লৌখৎকদবনি হায়না সিব সেনা মনিপুর ষ্টেট য়ুনিটকি প্রসিদেন্ট দাক্তর মোইরাংথেম তোম্বিনা অকনবা ৱাফম ফোঙদোরক্লি।

চৎলিবা থা অসীগী ২৩ দা ইম্ফালগী বাবুপারাদা লৈবা সিব সেনাগী ওফিসতা পাঙথোকখিবা পাউমীশিংগা উনখিবা থৌরম অমদা মহাক্না ৱাফম অসী ফোঙদোকখিবনি। মনিপুরদা মমাঙদা চত্থখিবা দেলিমিটেসনগী থবক থৌরমশিং অদুদা মওং মরীল তাদবা কয়ামরুম য়াওখ্রে। ভোৎতি থাদবা য়াহল্লগা মীরেপ্তি ওইবা য়াদবা কেন্দ্র নিপানলোম আউটরগী এসেমব্লি কন্সটিট্যুয়েন্সি শিংদা লৈরি হায়খি।

মসি হন্দক্কি দেলিমিটেসন্দা য়েংশিন্দুনা শেমদোকহৌবা মথৌ তাই হায়না তোম্বিনা ফোঙদোকখি। তম্পাক্কি লম ওইরিবা লাঙ্গোলনচিংবা মফমশিংদা সাইতু কেন্দ্র ওইহল্লকপা, উরিপোক্কি এরিয়া খরদা লমশাং কেন্দ্র ওইহনবা, ইম্ফাল ম্যুনিসিপাল কাউন্সিলগী ওইনা উরীপোক কেন্দ্রগী মনূঙদা ত্রাইবেলগী রিজার্ব এরিয়া ওইনা থমজিল্লকপা ময়াম য়াওরি। থৌওংশিং অসী চীঙগী কেন্দ্রশিংদসু য়াম্না থোক্লি। মরম অসীনা দেলিমিটেসনগী তঙায়ফদবা লৈরি হায়না মহাক্না থমখি।

অদূম ওইনমক, মনিপুরদা মীতোপ-মীয়ানচাগী মশীং অসূক্কি মতীক য়াম্না লৈরি। অশাবা অমসুং নিয়ম লান্না ইস্যু তৌরবা আধার ফাওবা পায়দুনা লৈবাক অসীগী অশেংবা সিটিজনগুম লৈরিবশিং অসী হান্না খন্দোকলবা মতূঙদা দেলিমিটেসনগী থবক চত্থবা চুমগনি হায়খি।