ময়াই কাবা দ্রগকি মায়োক্তা এম এস এফনা শীন্দুনা বাইক রেল্লি চৎখ্রে

মনিপুরি ষ্টূদেন্টস ফেদরেসন (এম এস এফ) না লীশাঙ শীৎনা চত্থদুনা লাক্লিবা,”ঐখোয় ময়াই কাবা দ্রগ থাদোক্লসি কেম্পেইন” গী শরূক অমা ওইনা থা অসীগী ৪ দা ” ময়াই কাবা চীঞ্জাক্তগী ঈনখৎলক্লিবা কয়াগী পুন্সি কনমিন্নসি” হায়বগী পাউজেল পুবা বাইক রেল্লি অমা পাঙথোকখ্রে।
ইম্ফাল ৱেষ্ট দিষ্ট্রিক্টকি মনূঙ চন্না লৈবা ক্বাক্কৈথেল টিদ্দিম গ্ৰাউন্দ দগী লমথারবা মতূঙ, বাইক রেল্লি অদূ কৈশাম্পাৎ, শীঙজমৈ, থৌবাল, ককচীঙ লমখায়, ৱাবগাই,ককচীঙ খূনৌ, ৱাঙূ লম্বীদা লাক্লগা মোইরাংলোমদা লাক্লবা মতূঙদা টিদ্দিম গ্ৰাউন্দা অমুক লমথূঙফম ওইখি।
রেল্লি অদূ লমথাবগী থৌরমদা শরূক য়াখিবা অমুকোগী প্রেসিদেন্ট এস সঞ্জয়না ফোঙদোকখিবা অমদা, ঐখোয়গী ঈরমদম অসী ঙসীদি লানবুং অমগা পাঙ্খক ওইদুনা লৈরিবনি।চৈরকশিদা ময়ায় কাবা দ্রগ কয়াগী তূঙনফম ওইরক্তুনা হৌগৎলক্লিবা নহারোল কয়ামরূম খাঙূথক্তা পুন্সি লোম্লি। খুন্নাই অসিগী মীরোলশিং তুম্না মাঙহন্ননবা অরোনবা এজেন্দা অমগী মখাদা দ্রগ থাজীল্লক্লব্রা হায়বগী চিংনবা চাউনা লৈরি।য়েলহৌমীশিং ঙসীদি মীকপ থোকপা মতমদু থেঙমল্লবনি।ঐখোয় দ্রগতগী লাপ্না লৈরসি,নহারোলশিংবু তমথিরবা ময়াই কাবা চীঞ্জাক্তগী কন্ননবা পান্দমদা বাইক রেল্লি অসী পাঙথোকপনি হায়খি।
এম এস এফকি প্রসিদেন্ট হিজম রোসন্না হায়, মনিপুরনা ইন্দিয়াগী ফীবান্নুংদা তিনখ্রবা মতূঙদগী লমদমসিদা কা হেন্না মহূ কল্লবা, মখল কয়াগী দ্রগকি পোৎলমশিং পুশিল্লক্তুনা লমদম অসীগী হৌগৎলক্লিবা নহারোল কয়ামরুম নিষাগী ঈপাক্তা লূপখিনবা হোৎনবা লেপত্রি হায়বসি ঐখোয় পূন্না খঙমিন্নবা মথৌ তাই। ষ্টেট লৈঙাক্না হীরমসিদা অনৌবা,অহেনবা খোঙথাঙ লৌখৎফম থোকই হায়খি।