মনিপুরগী পুৱারিদা এঙ্গলো-কুকি ৱার হায়বা অমত্তা থোকখিবা লৈতে, কুকি-জো কাঙলূপ্না খুদোংচাবা লৌননবা শেমজীন-শাজিনবনি: য়ু এন সি

আইন কায়না বংলাদেস, ম্যান্মারনচিংবা লৈবাকশিংদগী মীতোপ মশীঙ থীঙমদনা মনিপুরদা চঙশীল্লকপদগী ঙসীদি মনিপুরদা মীতোপকি ঈচাও মায়োক্নরগা লৈরে। নাকল অমরোমদা অদূঙৈ কুমশিং ১৯১৭ তগী ১৯১৯ ফাওবদা এঙ্গলো- কুকি ৱার থোকখি হায়না কুকি- জো কাঙলূপ্না ফোঙদোক্লিবসি মনিপুরগী পুৱারিবু শেমদোক্ননবা হোৎনরকপনি, অরানবা ৱাফম্নি, মখোয়গী খুদোংচাবা লৌননবা,মনিপুরদা মখোয়গী ফিদা অমা ফংননবা হোৎনরকপনি হায়না য়ুনাইটেদ নাগা কাউন্সিল (য়ু এন সি)না ময়েক শেংনা ফোঙদোরক্লি।

কাউন্সিল অসীগী ইনফোর্মেসন এন্দ পব্লিসিটি সেক্রেটরি জেমস হাওগী প্রেস ষ্টেটমেন্ট অমদা ৱাফম অসী থম্লকখিবনি। মহাক্কি চেরোল অদুদা মখাতানা ফোঙদোরক্লিবদি, মনিপুরগী পুৱারিদা এঙ্গলো- কুকি ৱার হায়বা অমত্তা থোকখিবা লৈতে হায়বসিনি। কুমশিং ১৯১৭,১৯১৮ অমসুং ১৯১৯ গী মতমদুদা মপান্দগী আইন কায়না চঙশীল্লক্লগা মনিপুরদা খুন্দাশিনখিবা কুকি- জোগী মীওইশিংনা ঊখ্রূল, চান্দেল, তমেংলোংনচিংবা মফমশিংদা লৈবা নাগা কাঙলূপকি নূপী অঙাঙ কয়া পাক্তক্ননা হাৎখিবগী মথক্তা নাগাশিংগী য়ূম-কৈ পাক-সন্না মৈ থাদোক্তুনা ঊৎ ওলহনখি হায়না ফোঙদোরক্লি।

জেমসকি চেরোল অসিনা মখাতানা ফোঙদোরক্লিবদি, হৌখিবা কুমশিং ২০২৩ গী মে অহুমদগী মৈতৈ অমসুং কুকি- জো কাঙলূপ অনীগী মরক্তা থোক্লিবা অকনবা হাৎনা-শুনবগী হীঙশা অসী লোইশিন্ননবা য়ু এন সিনা থৌদাং লৌদুনা অঙম্বা থাক্তা হোৎনদুনা লাক্লি। চৈরকশিদা কুকি- জোশিংনা ইজরেলগী প্রাইম মিনিষ্টর, য়ু এন ও, ইন্দিয়াগী প্রাইম মিনিষ্টর নচিংবদা তোঙান- তোঙানবা ৱাফম কয়া য়াওবা মেমোরেন্দমশিং পীশীনখিবা অদুদা নাগাশিংবু ঈকায়বা পীবা অমসুং নাগা অমদি মনিপুরগী  পুৱারিবু লান্না উহনগদবা ৱাফম কয়া য়াওবসু থেংনরে হায়না মহাক্কি চেরোল অসীদা ফোঙদোরক্লি।