মনিপুরদা কোবিদ পোজিটিব ওইরবা মীওই অমা নৌনা থেংনরে, চেকশীন থৌরাং লৌখৎখ্রে

মতম কুইনা কোবিদ-১২ পোজিটিব ওইরবা অনাবা অমত্তা লৈতবদগী লমদম অসীগী মীয়াম পোত্থাবগী স্বর হোন্দোক্তুনা মশা-মশাগী মহৌশাগী থবক-থৌরমশিংদা মায় ওন্সীন্নরগা নুঙাইনা লৈরুরবা চহী অমা মখায়রোমগী মতূঙদা চৎলিবা থা অসীগী ১০ দা ঈখঙ খঙহৌদনা মনিপুরদা কোবিদ ১৯ পোজিটিব কেস অমা নৌনা থেংনরকপদগী মীয়াম কা হেন্না মীপাইবা পোক্নরে। লায়না-লাইচৎ মখল অসীদগী মীয়াম চেকশীন্না লৈননবা অকনবা চেকশীন থৌরাং লৌখৎনবা ষ্টেট হেল্থ অথোরিটিনা খঙহনখিবগা লোয়ননা হেল্থ দিপার্টমেন্টনসু লৌখৎফম থোকপা চেকশীন থৌরাং পূম্নমক লৌখৎপা হৌখ্রে। পোজিটিব ওইরবা মীওই অদূ বিষ্ণুপুর দিষ্ট্রিক্ট তগীনি। মহাক মহৈরোই নূপীমচা অমনি,মনিপুর য়ুনিভর্সিটিদা তম্বনি হায়রি।হৌজিকমক্কি ওইনদি মহাক হায়দরাবাদতা চৎখ্রে হায়রি।

ইন্দিয়া পূম্বগী ওইনা য়েংলুবদা চৎলিবা থা অসীগী ১০ গী অয়ূক পূঙ ৮ ফাওবদা কোবিদ পোজিটিব কেস ৬,৮১৫ য়ৌখ্রে। হৌখিবা জূন ৯ অমসুং ১০ গী মনূঙখক্তদা ইন্দিয়াগী ওইনা কোবিদ পোজিটিব কেস ৩২৪ নৌনা থেংনখিবনি। মদূগী মনূঙদা কর্নাটাকাখক্তদা কেস ১৩৬,গুজরাত্তা পোজিটিব কেস ১২৯,কেরলাদা ৯৬,মৈধ্য প্রদেশতা ৯,হরিয়ানাদা ৮,মহারাষ্ট্র দা ৬,ওরিষ্যাদা ৫,অন্দ্র প্রদেশ, তেলঙ্গনা অমসুং মনিপুরদা অমমমনি। হৌজিকফাওবগী ওইনা আরুনাচল প্রদেশ, চন্দিগর, জম্মু অমসুং কাস্মির, মিজোরাম, উত্তরখন্দ, উত্তর প্রদেশ, ত্রিপুরাদদি কোবিদ পোজিটিব কেস অমত্তা লৈত্রি হায়রি। মনিপুরদগী নূপীমচা অদূ মপান লৈবাকশিং অমসুং ইন্দিয়াগী অতৈ ষ্টেটশিংদা চৎলুবগী রেকোর্দ সু অমত্তা লৈতে হায়না ষ্টেট লৈঙাক্কি হেল্থ দিরেক্তরেটনা ফোঙদোরক্লি।

হৌজিক্তা ফংবা পাউ অমগী মতূঙ ইন্না, কোবিদ পোজিটিব ওইখ্রবী মনিপুরগী মহৈরোই নূপীমচা অদুনা ভারা লৌদুনা লৈরম্বা ইম্ফাল ৱেষ্ট দিষ্ট্রিক্ট কি ঘরি মখা লৈকায়দা লৈবা য়ূম অদূগী য়ূম্বূ ওইবা, মশাগী চহী ৫৮ লোম শুরবী নূপী অমসু নৌনা কোবিদ-১৯ পোজিটিব ওইরম্বা থেংনখ্রে। হৌজিক অকোনবগী নূপী অসী থারগা মনিপুরদা নৌনা কোবিদ পোজিটিব ওইরবা মীওই অনী শুখ্রে।