মনিপুরগী ওইনা সেন্সস য়ৈথোকখ্রে,সেপ্তেম্বর অমদগী হৌরগনি

লৈবাক অসিগী ষ্টেট অমদি য়ুনিয়ন তেরিতোরী পূম্নমক্তা সেন্সসকি থবক, লাক্লিবা এপ্রিল অমদগী হৌরগনি হায়না রেজিষ্ট্রার জেনরেল এন্দ সেন্সস কম্মিস্নার, গভর্নমেন্ট ওফ ইন্দিয়ানা হৌখিবা জানুৱারিগী তরেৎতা নোটিফিকেসন অমা থোক্তুনা মীয়ামদা খঙহনখিবা অদু মনিপুরগী ওইনদি চৎনররোই, চহী অসীগী লাক্কদৌরিবা সেপ্তেম্বর অমদগী কূনথ্রা ফাওবা, থাবূম অমা চূপ্না য়ূমকোক মশীং থীরগনি হায়রি।
মসীগী মতাঙদা মনিপুর লৈঙাক্কি কম্মিস্নার (হোম) অশোক কুমারনা ঙরাং অনৌবা নোটিফিকেসন অমা থোক্তুনা মীয়ামদা খঙহল্লক্লি।মসীনা মরম ওইরগা হান্না ইন্দিয়া লৈঙাক্কি সেন্সস কম্মিস্নার ম্রিতুঞ্জয় কুমার নরায়ন্না জানুৱারিগী তরেৎতা থোকখিবা নোটিফিকেসন অদূ মনিপুরগী ওইনদি চৎনররোই হায়নসু কম্মিস্নর অশোক কুমারগী নোটিফিকেসন অসীদা পল্লি।
লাক্লিবা আগষ্ট ১৭ তগী থা অদূমক্কি ৩১ ফাওবা নুমিৎ ১৫ নি চূপ্না সেল্ফ ইন্যুমরেসনগী খুদোংচাবা মীয়াম্না ফংলগনি।মসীগী মতূঙদা মথঙ-মনাও নাইনা সেপ্তেম্বর অমদগী য়ূমকোক মশীঙ থীবা হৌরগা থা অদূগী ৩০ ফাওবা থবক অসী চত্থগনি হায়রি।
নাকল অমরোমদা, মনিপুর লৈঙাক্কি মায়কৈদগী থোরক্লিবা নোটিফিকেসন অসী মীয়াম পঙথনবা তাৎকি লাং থাকপনি, সেন্সসকি মতম য়ৈথোক্লবসু মীতোপ খন্দোক্ট্রবদি মদূগী ৱাহন্থোক অমত্তা লৈতে হায়না কেম্পেইন ফোর জষ্ট এন্দ ফ্যের দিলিমিটেসন (জে এফ দি)গী মায়কৈদগী অকনবা ৱাফম ফোঙদোরক্লি।ইন্দিয়া লৈঙাক্কি লৌনম-লাংদা খূদূঙ ইন্দুনা চৎলিবা মনিপুর লৈঙাক্কী ওফিসিয়লশিং অমদি মীয়ামগী মীহূৎ ওইরিবশিং অসী ঙসীদি মীয়ামগা শম্নবা ঙমদ্রবনি। অসীগুম্বা ৱাফমশিং অসীদি অনৌবা নত্তে, ঙক্নীঙাই করিসু ওইদে, লৈঙাক্কি তাৎ অসীদা ইরৈচাশিং পঙথগদবা লৈত্রে হায়না জে এফ দিনা ফোঙদোরক্লি।