মনিপুরগী দিষ্ট্রিক্ট মরীদা কম্বাইন্ড ফোর্সনা সর্স ওপরেসন চত্থবদা য়াম্লবা খূৎশু-খূৎলায়শিং রিকোভর তৌবা ঙমখ্রে

ইন্দিয়ান আর্মি, মনিপুর পুলিস, সি আর পি এফ, আই টি বি পি অমসুং বি এস এফকি অপূনবা কম্বাইন্দ সেক্যুরিটি টিম অমনা চৎলিবা এপ্রিল থা অসীগী হৌখিবা চয়োল অসীদা মনিপু্রগী তোঙান তোঙানবা দিষ্ট্রিক্ট মরি- ইম্ফাল ইষ্ট, চুরাচান্দপুর, ইম্ফাল ৱেষ্ট অমসুং তেংনৌপল দিষ্ট্রিক্ট শিংগী চিংননিঙায় ওইবা মফমশিংদা সর্স ওপরেসন চত্থবদা য়াম্লবা নোংমৈ মখলশিং, নোংমৈ মরূ, গ্ৰেনেদশিং রিকোভর তৌবা ঙমখ্রে।

ইন্টলিজেন্স কি সোর্সতা য়ূম্ফম ওইবা পাউগী মতূঙ ইন্না চত্থখিবা সর্স ওপরেসন শিং অদুদা মশীঙ য়াম্লবা খূৎশু- খূৎলায়শিং অদূ রিকোভর তৌবা ঙমখিবনি হায়রি। ইম্ফাল ইষ্ট, ইম্ফাল ৱেষ্ট অমসুং তেংনৌপল দিষ্ট্রিক্টশিংগী চিংননিঙায় ওইবা মফমশিংদা থা অসীগী ১৯ দা সর্স ওপরেসন চত্থবদা এ কে রাইফল অমা, এস এল আর অমা, নাইন এম এম কার্বাইন মেচিন গন অমা, মোদিফাইদ সিঙ্গল বেরেল রাইফল অমা, পিষ্টোল অমা, নোংমৈ মরুশিং লানগী মতৌগুম পৈশিন্দুনা থম্লম্বদগী রিকোভর তৌখি।

এপ্রিল ১৮ দা ইম্ফাল ইষ্ট দিষ্ট্রিক্ট তগী কম্বাইন্দ সেক্যুরিটি টিম্না ৭.৬২ এম এমগী এস এল আর অমা, ৭.৬৫ এম এমগী পিষ্টোল অমা, সিঙ্গল বেরেল ব্রিচ-লোদিং রাইফল ( এস বি বি এল)  অনী, গ্ৰেনেদশিং অমসুং নোংমৈ মরূ কয়ামরুম রিকোভর তৌবা ঙমখি। তেংনৌপলগী সালভোম এরিয়াদগীসু পিষ্টোল অনী অমসুং আই ই দি ১০ ফংবা ঙমখ্রে অদুগা চুরাচান্দপুর দিষ্ট্রিক্টতগী থ্রী নোট থ্রী রাইফল অমা, নাইন এম এমগী পিষ্টোল অমা, মোদিফাইদ কর্বাইন মেচিন গন অমা, সিঙ্গল বেরেল রাইফল অমা, মোদিফাইদ ৮১ এম এমগী মোরতার অমা, কন্ট্রিমেদ পোম্পি অনী অমসুং নোংমৈ মরূ কয়ামরুম রিকোভর তৌবা ঙমখি হায়রি।