মনিপুরদা থোক্লিবা হীংশা অসীগী মতাংদা কংগ্রেস পার্টিনা অরানবা থৌওং অমত্তা চত্থখিবা নত্রগা ৱাকায় ঙাঙনখিবা, হায়নখিবা লৈতে: এস মনাওতোন

মনিপুরদা হৌজিক থোক্লিবা হীংশা অসীগী মতাংদা কনাগুম্বা অমত্তগা উনরগা নত্রগা উনদনা ৱারী- ৱাতায় শানবা নত্রগা ৱা পূত্থরুবগী থৌওং লৈতে হায়না মনিপুর প্রদেস কংগ্রেস কম্মিটি (এম পি সি সি) গী স্পোক্সপর্সন দা. এস মনাওতোন না ফোঙদোকখ্রে। ঙরাং ইম্ফালদা লৈবা এম পি সি সিগী ওফিসতা পাঙথোকপা পাউমীশিংগা উনখিবা থৌরম অমদা ৱাফম অসী মহাক্না ফোঙদোকখিবনি। মহাক্না হায়, হন্দক ৱারল্ড কুকি-জো ইন্টলেকচুয়েল কাউন্সিলনা কংগ্রেস লুচিংবা অমসুং লোক সভাদা ওপ্পোজিসন লিদর ওইরিবা রাহুল গান্ধী অমসুং পার্টী অসীগী প্রসিদেন্ট মালিক আর্জুন খরগেদা পীশীনখিবা মেমোরেন্দমনি হায়বা চেরোল অমগী কোপীশিং পল্লেল এরিয়াদা চাইথোরকখি।

কুকি-জো ইন্টলেকচুয়েল কাউন্সিলনা কংগ্রেস পার্টিগী লুচিংবা অনীদা পীশীনখি হায়রিবা মেমোরেন্দমগী কোপীশিং অদূ কুকি ফূরূপকি মীওইনা চাইথোকপগী মহুৎ মৈতৈ মচা খরনা ওইনা চাইথোকপনি হায়খি।মদূ কংগ্রেস পার্টিগী ইজ্জৎ শোকহন্ননবা থওইনা চত্থরকপা থৌশিল অমনি হায়বসু খঙবা ঙম্লে হায়খি। হায়রিবা মেমোরেন্দম অদূদা মরূওইনা পল্লিবা ৱারোলদি, “হান্না ঙাঙনদুনা য়ানখিবগী মতূং ইন্না মনিপুরদা কুকি- জো কাঙলূপকি তোঙানবা য়ুনিয়ন টেরিটোরি অমা শেম্ননবা হৌজিক চত্থরিবা পারলিয়ামেন্টকি নিংথম মীফম অসীদা পুখৎপীয়ু”, হায়বসিনি।

অসুম্না কংগ্রেস পার্টিগী ইজ্জৎ শোকহন্ননবা শেমজীন-শাজিনবা মেমোরেন্দম অদূ চাইথোকপদা হৌজিক লৈরিবা ষ্টেট লৈঙাক অসীগা য়াম্না নক্না চৎমীন্নরিবা পার্টীগী এম এল এ অমা য়াওরে হায়বসি কংগ্রেস পার্টিদা লৈরিবা মখোয়গী টেলিফোনিক কনভরজেসন অমদগী ময়েক শেংনা খঙবা ঙম্লে হায়খি। কংগ্রেস পার্টিগী মায়কৈদগী কুকি- জো নত্রগা অতোপ্পা কনাগুম্বা অমত্তগা ৱাকায় Activity, হায়নখিবা লৈতে,  ৱা পূত্থরুবসু লৈতে হায়না মহাক্না ফোঙদোকখি।