মনিপুরদা থোক্লিবা হীঙশা অসী লোইশিন্নবা সেন্টর লৈঙাক্না লৌফম থোকপা মথৌদাং লৌদ্রি: বিমোল অকোয়জম

মনিপুরদা হৌখিবা কুমশিং ২০২৩ গী মে অহূমদগী কুকি -জো কাঙলূপকি মিলিটেন্টশিংনা ম্যান্মারদগী লোন্না চঙশীল্লকপা লালহৌবশিংগা লৌতূনরগা চত্থরক্লিবা হীঙশাগী লান অসীনা মরম ওইরগা লাঞ্জেন্নবদগী হৌজিক তোঙান তোঙানবা মফমশিংদা চঙজফম লৌদুনা লৈরিবা ঈমূঙ লীশীং কয়ামরুম অসীগী খুন্দা-লৈতাহন্ননবা থবক পায়খৎপদা সেন্তর লৈঙাক্না পূকচেল শেংদবা মতৌ অমা তশেং তশেংনা উবা ফংলি।সেন্তরনা থম্মো‌য় শেংনা থবক তৌরবদি আই দি পিশিং অসী নহান্না মশা-মশাগী মহৌশাগী লৈফমশিংদা হঞ্জিলহনবা ঙম্লম্লগদবনি হায়না ইন্নর মনিপুর পার্লিয়ামেন্টরি কন্সটিট্যুয়েন্সিগী লোক সভা এম পি ওইনা লৈরিবা দা.অঙোমচা বিমোল অকোয়জমনা য়াম্না কন্না পেন্দবা ফোঙদোকখ্রে।
লোক সভা মীফমগী জেরো অৱারদা মহাক্না ৱা ঙাঙবগী তাঞ্জা লৌরদুনা ৱাফম অসী ফোঙদোকখিবনি।মনিপুরদা থোক্লিবা ঈরাং অসী লোইশিনবা ঙমহন্দনা ঙসীফাওবা থম্লিবা অসী থওইনা তৌরগে হায়বা অমা য়াওনা চত্থরকপা প্রোক্সি ৱার অমনি হায়বা ৱাফম বিমোলনা থমখি। জম্মু অমসুং কাশ্মিরদা লোন্না, পাকিষ্টান মায়কৈরোমদগী টেরোরিষ্ট অমা চঙলকপগী পাউ হেক ফংবদা মহাকপু ফাদ্রিবা ফাওবা নত্রগা ন্যুট্রেলাইজ তৌদ্রিফাওবা সেক্যুরিটিগী ওপরেসন লেপ্তনা চত্থবা ঐখোয়না থেংনরি। অমরোমদা, মনিপুরদা, মিলিটেন্ট কয়ামরুম চঙশীল্লক্লগা চহী অহূম চূপ্না মনিপুরদা লান্দারক্তুনা মীওই চা কয়ামরুম হাৎলক্লবা মতমসিদা ইন্দিয়া লৈঙাক্না করিসু খঙজদবা ভাবোক্কুম তঙমীন্না কুমহৈ য়েংদুনা লৈরি হায়খি।
প্রাইম মিনিষ্টরনা মপান লৈবাকশিংদা কোয়দুনা লৈরি , মসী মনিপুরবু ইন্দিয়াদগী তোঙান তাখ্রবসু য়ারে হায়বনি হায়না বিমোলনা পেন্দবা ফোঙদোকখি।