মনিপুরদা প্রসিদেন্ট রুল শাংদোকহন্দনবা এম পিশিংনা থবক পায়খৎকদবনি: মহেশ্বর থৌনাউজম

মনিপুরদা হৌখিবা ফেব্রুয়ারি থাগী অঙনবা শরুক্তগী থমজিনখ্রবা প্রসিদেন্ট রুল অসী লমদমসিগী মীয়াম্না পামদে, মীয়ামগী মীহূৎশিংনসু পোপ্যুলর লৈঙাক অমা থম্বা পাম্মি। চৈরকশিদা হন্দক চৎলিবা থা অসীগী ২১ দগী হৌগদৌরিবা পারলিয়ামেন্ট সেসন অসিদা হৌজিক মনিপুরদা চৎনরিবা পি আর অসী মখাতানা থা তরুক শাংদোক্লবা য়াই হায়না মীয়াম অমসুং তোঙান-তোঙানবা পোলিটিকেল এনালিষ্টশিংনা ফোঙদোক্নরক্লিবা অসীনা মনিপুরগী মীয়ামগী পূক্নীঙ- ৱাখলদা খোয়রাঙ-খোয়শাওনবা ফাওহল্লি হায়না আর পি আই ( অথৱালে) গী নেস্নেল সেক্রেটরি, অদুগা পার্টি অসীগী মনিপুর য়ুনিটকিসু প্রসিদেন্ট ওইনা থৌ পুরিবা মাহেশ্বর থৌনাউজম্না ফোঙদোকখ্রে।

আর পি আই ষ্টেট য়ুনিটকি ওফিসতা ঙরাং পাঙথোকখিবা পাউমীশিংগা উনবগী থৌরমদা মাহেশ্বর থৌনাউজম্না ৱাফম অসী ফোঙদোকখবনি। মহাক্না মখাতানা হায়, হন্দক পাঙথোক্কদৌরিবা পারলিয়ামেন্ট সেসন অসিদা মনিপুরগী মীহূৎশিংনা পার্টি পোলিটিক্সকি ৱাফম লোয়নমক থাদোক্নরগা হৌজিক মনিপুরদা মীয়ামনা রিলিফ কেম্প শিংদা অৱা-অনা খাঙদুনা লৈরিবশিং অসী মশাগী মরমদমদা হঞ্জিলহন্ননবা ফিভম শেমগৎনবা তকশীনগদবনি।

মনিপুরগী মরূওইবা ইস্যুশিং পুখত্তুনা মদুগী সোল্যুসনশিং পুরক্নবা থবক পায়খৎকদবনি হায়খি।
মীফমগী ওন রেকোর্দ তা লৌখিবা ৱারেপশিং থবক্তা ওন্থোক্নবা অঙম্বা থাক্তা হোৎনগদবনি। করিগুম্বা পি আর মনিপুরদা শাংদোরক্নবগী ৱাফম পারলিয়ামেন্ট সেসন মনূঙদা পাস তৌরক্কদবা মতাং ওইরবদি মহাক মশামক চত্তুনা পার্টিগী লুচিংবশিং উনদুনা তকশীল্লুননবা শেম-শাবা লোইরে হায়না মাহেশ্বর থৌনাউজম্না মখা তাখি।