হৌখিবা মমাঙ চহীগী দিসেম্বর ১৪ দা থৌবাল দিষ্ট্রিক্ট পুলিশ কম্মান্দোনা নোংমৈনা কাপ্পদা খুল ঙাকপা নহা অমা শিখিবা অমসুং নুমিৎ অদূমক্তদা খুল ঙাকপা নহা তরুক ফাজীনখিবদগী ঙসীফাওবা থাদোক্তনা লৈরিবা অসীগী মায়োক্তা শলূঙফম খূঞ্জাও মৈরা পায়বী অপূনবা লূপ্না শীন্দুনা য়ানীঙদবগী মীফম অমা চত্থখ্রে।
খুল ঙাকপা ঈচাশিংদা মনিপুর পুলিসনা মীওৎ-মীনৈ অমত্তা চত্থবা য়ারোই, খুল ঙাকপশিং ফাবা, হাৎপা পুলিস কম্মান্দোশিং লৈঙাক্না আইনগী মতূংইন্না অকনবা চৈরাক পীগদবনি অমসুং মতম চূপ্পগী ওইনা দিসমিস তৌগদবনি, কুকি- মিলিটেন্ট অমত্তা হাৎপা, ফাবা ঙমদ্রিবা মনিপুর পুলিস কম্মান্দোশিংনা মৈতৈ ফূরূপ কন্ননবা অমসুং মীয়াম অসীগী লন-থুম ঙাক্লিবা খুল ঙাকপা ঈচাশিংদা নোংমৈ মতোন ওন্সিনবগী থৌওং য়াবা ঙম্লোই হায়বা প্লেকার্দশিং পায়দুনা য়ানিংদবগী খোঙজং চত্থখিবনি।
শলূঙফম মৈরা পায়বী অপূনবা লূপনা শীন্দুনা চত্থখিবা সিট- ইন-প্রোটেষ্ট অদূ লমদম অদূগী ক্লব ওরগনাইজেসনশিংনা মপূঙফানা শৌগৎখিবগা লোয়ননা ষ্টেট লৈঙাক্না খুল ঙাকপা হাৎপা অমসুং ফাবদা চেন্নরিবা পুলিস কম্মান্দোশিং অকনবা চৈরাক অথূবা মতমদা পীদ্রবদি হেন্না কনবা খোঙজঙ চত্থরগনি হায়না ফোঙদোকখি।