মহৌশাগা মান্নদবা মওংদা সিএম মশামক্না অপাম্বা মিনিষ্টরশিং খঞ্জবা ঙম্লোইদৌরি, দিল্লিদগী হাপ্লক্কদৌরি

নুমিৎ মরিনি শুরক্লবা য়ূম্নাম খেমচান্দ না লুচিংবা মনিপুর লৈঙাক্কি হৌজিক হাঙদুনা লৈরিবা মিনিষ্টর তরেৎকি ফম অসী, মহৌশাগী থৌওংগী মতূঙ ইন্না হায়বা তারবদি চিফ মিনিষ্টর মশামক্না পামজবা, য়ানজবা এম এল এশিং খঞ্জরগা মেন্সিঞ্জগদবনি অদূবু চিফ মিনিষ্টর খেমচান্দগী লাইবক্তা মদূগী খুদোংচাবদুদি তম্বিরমদ্রে। অনৌবা মিনিষ্টরশিং হাপ্পগী থবক-থৌরম পূম্নমক দিল্লিদা ফম্লিবা বি জে পিগী নেস্নেল লিদরশিংনা থিনবা খূদোম্বী অদোমদা চৎখ্রগনি হায়না থাজবা য়াবা পাউগী লীখূন অমনা ফোঙদোরক্লি।

হৌজিক চিফ মিনিষ্টর মশামক য়াওনা কাউন্সিল ওফ মিনিষ্টরদা মীওই মঙা লৈরে, তরেৎ ৱাৎলি।হান্না ৱাশক লৌখ্রবা মিনিষ্টর নেমচা কিপগেন অমসুং লোসি দিখোদা দিপ্যুটি চিফ মিনিষ্টরগী ফম পীগনি অদূগা গোবিন্দাস কোন্থৌজম দনা হোমগী পোর্টফোলিও থিন্দোক্কনি হায়না নেস্নেল লিদরশিংনা থাজবা পীরকপগী ৱাফমখক্তনি। পোর্টফোলিওশিং অদূ পীরে হায়বগী ওফিসিয়েল ওইবা ওর্দর নত্রগা নোটিফিকেসনদি হৌজিকফাওবা অমত্তা থোক্লকপসু লৈত্রি হায়না খঙহল্লক্লি।

হৌজিক লৈরিবা ফীভম অসিদা করম্বা অমদি কনা-কনাদা মিনিষ্টরগী ফম পীরক্কদগে হায়বসি কনাগুম্বা এম এল এ অমত্তনা হায়বা ঙম্নদ্রি।মমাঙদা ফম পীবীরক্নবা ৱানোম্বা চৎনরুবা এম এল এ অমত্তদা মিনিষ্টর পীরকখিবগী ৱাফম লৈখিদবা মরম্না নৌনা ৱানোম-থৌনোম্বা তৌগদবসু কিনরে হায়রি।অথূবা মতমদা সেন্টরগী মায়কৈদগী মিনিষ্টর ওইগদবশিংগী লিষ্ট অমা চিফ মিনিষ্টর খেমচান্দ দা থারকপা য়াই, মদূগী তুংদা সি এম্না গভর্নরগা তান্নরগা মিনিষ্টরশিং ৱাশক লৌবগা লোয়ননা পোর্টফোলিও শিং য়েন্থোরক্কদবনি হায়রি।