মহারাবি লমখায়দগী য়াম্লবা টলপ মৈরা পায়বী ঈমাশিংনা ফাগৎলবা মতূঙদা পুলিস্তা শিন্নখ্রে

ইম্ফাল ৱেষ্ট দিষ্ট্রিক্টকি মনূঙচন্না সেকমাই পুলিস ষ্টেসনগী জুরিসদিক্সন মখাদা লৈরিবা মহারাবি লমখায়দা মৈরা পায়বী ঈমাশিংনা য়াম্লবা টলপ বোরা কয়া ফাগত্তুনা পুলিস অথোরিটিদা শিন্নখ্রে। থৌদোক অসী থা অসীগী ২৩, খোংজোম দেগী থৌরমশিং মীয়াম্না পাক-সন্না পাঙথোক্লিঙৈ চৈরক্তা মনিপুর পুলিস অমসুং অতৈ সেক্যুরিটি পার্সনেলশিংসু মায়কৈ অমরোমদা অকনবা সেক্যুরিটিগী চেকশীন থৌরাংশিং লৌখত্তুনা লৈনখিবা চৈরক্তা দস চাকাগী টাটা ট্রক অমদা হাপ্লগা পুরকখিবা টলপ বোরা ৩০০ লোম লমদম অদূগী মৈরা পায়বী ঈমাশিংনা ফারবা মতূঙদা ষ্টেট পুলিস্তা শিন্নখিবনি।

তেন্দোংয়ান, শান্তিপুর, মহারাবি অমসুং পোৎশঙবম এরিয়াগী মৈরা পায়বীশিংনা য়াম্লবা টলপশিং অদূ ফাগৎপা ঙমখিবনি। রেজিষ্ট্রেসন নম্বর এন এল ০১ এ আর-৪৪৯৮ হায়রিবা টাটা ট্রক অদূ অয়ূক্কি পূঙ ৯.৩০ রোম তারকপদা দিমাপুর মায়কৈরোমদগী লাক্ল গা মহারাবি লমখায়দা থুংলখিবনি। ফাগৎলবা মতূঙ সেকমাই পুলিস ষ্টেসন মমাঙ ফাওবা পুরবা মতূঙদা মীয়াম্না য়াম্লবা টলপশিং অদূ য়েংশিনখি। পোৎলমশিং অদূ ফুদ সেফটি দিপার্টমেন্টকি ওফিসিয়েলশিংদা শিন্নরবা মতূঙদা হৌনবী মতূঙ ইন্না দিসপোজ তৌখ্রগনি হায়রি।

পোৎলমশিং অদূ ঈমা মৈরা পায়বীশিংনা মহারাবিদা অদুম্মক মৈ থাদোক্তুনা মাঙহন্ননবা হোৎনরিঙৈ চৈরক্তা সেকমাই পুলিসকি টিম অমা লাক্তুনা ষ্টেসন ফাওবা পুরকখিবনি। পুলিস অমসুং এক্সসাইজ অথোরিটিনা পুখিবা নিষাগী পোৎলমশিং মীয়াম মমাঙদা মৈ থাদোক্তুনা মাঙহনখিবগী থৌদোকশিং লমদম অসীদা য়াম্না তাঙনা থোক্লি হায়না মৈরা পায়বী অমনা ফোঙদোকখি।