লাক্লিবা চয়োল অসীগী মনূঙদা লুচিংবা অমা খল্লগা লৈঙাক চল্লাইবা ঙমদ্রবদি এম এল এ পূম্নমক রিজাইন তৌবিয়ু: এম তোম্বী

বি জে পি লেজিসলেচর পার্টিগী মনূঙদা শক্তিগী লান চত্থরকপদগী চিফ মিনিষ্টর নোংথোম্বম বিরেন্না মফমদগী রিজাইন তৌখিবা মতূঙদা হৌজিক মনিপুরদা এনিমেটেদ সস্পেন্সন থমজিনখিবদগী মীয়ামগী লৈঙাক অমা লৈজরম্বদু কাং-খোং চাইহনখ্রে। ষ্টেট লেজিসলেটিব এসেমব্লি দিজোল্ব তৌদ্রি হায়বগী ৱাফমখক্তমক মঙায়রে;  গভর্নমেন্ট ফঙ্কসন্নরি পূম্নমক ফেল ওইরে। চৈরকশিদা ঙসীফাওবা বি জে পিগী এম এল এ শিংনা অমত্তা ওইনা য়াশিন্নবা পুরক্তুনা অনৌবা লুচিংবা অমা খন্ননবা থৌরাং পায়খৎপগী মহুত্তা খাইবুং-খাইবুং তানদুনা ঐগী, মাগী হায়বা কাঙলূপ অনী-অহুম থোক্তুনা শক্তি মুন্নবগী কেম্প তৌনদুনা লৈরে হায়না সিব সেনা মনিপুর য়ুনিটকি প্রসিদেন্ট দা. মোইরাংথেম তোম্বীনা অকনবা ৱাফম ফোঙদোকখ্রে।

মনিপুরগী লুরবা তাঞ্জা অসিদা মখোয় মশেল মশা-মশাগী খুদোংচাবা ফংননবা হোৎনরকপদা মীয়াম অসী ৱাবনা খম থেংলে। অথূবদা বি জে পি লেজিসলেচর পার্টিগী লুচিংবা খল্লগা মীয়ামগী ইন্টরেষ্টতা থবক তৌগদবা, মতীঙ লৈবা চিফ মিনিষ্টর অমগী মখাদা সাসন তৌদ্রবদি মশা মশাগী ফম কোন্দুনা লৈরগনু, ফম থাদোকপিরো হায়না মহাক্না মখাতানা ফোঙদোকখি।

ইম্ফালগী বাবুপারাদা লৈরিবা পোলিটিকেল পার্টি অসীগী ওফিসতা পাউমীশিংগা উনখিবা থৌরম অমদা তোম্বীনা ৱাফম অসী ফোঙদোকখিবনি। মনিপুরদা পি আর থম্বা হায়বসি মীয়ামগী অপাম্বা নত্তে। মীয়ামগী ইন্টরেষ্ট তা থবক তৌবা ঙমদ্রবনিনা ঙম্নমক রিজাইন তৌবিয়ু, অনৌবা মীখল পাঙথোক্তুনা মনিপুর কনবা ঙমগদবা এম এল এশিং থাগত্তুনা অনৌবা লৈঙাক শেমহল্লসি হায়না মহাক্না ফোঙদোকখি।