কুকি- মিলিটেন্ট শিংনা কৌত্রুক মায়কৈদা অমূক হন্না নোংমৈ রাউন্দ কয়ামরুম কাপশীন্দুনা লান্দারকখ্রে

মতম শাংনা, হৌখিবা থা ১৯ হেন্না কুকি- মিলিটেন্ট শিংনা লমদম অসীগী মৈতৈ খুঞ্জাশিংদা বোম, নোংমৈনচিংবা কাপশিন্দুনা এত্তেকশিং চত্থদুনা লাকখিবদু হন্দক মরক নুমিৎ খরা তূমিন্না লৈরুরবা মতূংদা নৌহৌননা নোংমৈ কাপশীন্দুনা লান্দারকখ্রে। ইম্ফাল নোংচূপ পানাগী মনূং চন্না লমশাং পুলিস ষ্টেসনগী জুরিসদিক্সন মখাদা লৈরিবা কৌত্রুক মৈতৈ খুলদা কুকি মিলিটেন্ট শিংনা বেথেল কুকি খুলগী চীঙশাং পরেংদগী লেপ্পা লৈতনা নোংমৈ কাপশীন্দুনা লান্দারকখিবনি হায়রি। চৎলিবা থা অসীগী চৈচৎ ২১ গী নুংদাং পূং ৭.৩০ রোম তারকপদগী হৌরগা দিসেম্বর ২২ গী অহীং ফাওবদা ঙাইহাক ঙাইহাক কান্নরগা কৌত্রুক চীঙখোঙদা লৈরিবা মৈতৈ খুঞ্জাশিংদা বোম অমসুং নোংমৈ রাউন্দ কয়ামরুম কাপশীন্দুনা লান্দারকখিবনি হায়রি।

কৌত্রুক, ফয়েংনচিংবা কুকি-জো কাঙলূপ্না খুন্দারিবা বেথেল চীঙশাঙগা য়াম্না নক্না লৈরিবা খুঙ্গংশিং অসীগী খুঞ্জাশিং ঙাক শেন্দুনা লৈরম্বা ভিল্লেজ ভল্লন্টিয়রশিং লৈঙাক্না তকথোকখিবা মতূংদগী লমদম অসোমগী মৈতৈ খুঞ্জাশিং ঙাক- শেন্দুনা মখোয়গী পুন্সি অমসুং লন-থুম ঙাকপী-শেনবিনবা কনাশু য়াওদনা লৈরিবনি। অসীগুম্বা ফীভম অসীদা কুকি-জো মিলিটেন্টশিংনা খুদোংচাবা লৌরগা ঙাইহাক লৈতনা মৈতৈ খুঞ্জাশিংদা বোম, নোংমৈ কাপশীন্দুনা লান্দারক্লিবনি হায়না কৌত্রুক খুঙ্গংগী মৈরা পায়বী ঈমাশিংনা ফোঙদোরকখি।

খুঞ্জাশিং নসু লাইসেন্স গন শীজিন্নদুনা খূৎ হনদুনা নোংমৈ কাপখি। চৈরকশিদা, মফম অদুদা কেম্প তৌদুনা লৈরিবা সেন্ট্রেল সেক্যুরিটি ফোর্স কি মায়কৈদগী কুকি-জো মিলিটেন্টশিংনা নোংমৈ কাপশীল্লক্লিবদু খঙলবসু মতম চানা খূৎ হন্দুনা পাউখুম পীখিদে হায়না খুঞ্জাশিংনা পেন্দবা ফোঙদোকখি।বেথেল কুকি খুলগী চীঙশাং পরেংদা লৈরিবা কুকি টেরোরিষ্ট শিং লৈঙাক্না খূদক্তা তকথোক্কদবনি, মখোয়না বঙ্কর কয়া মশীং থীঙমদনা শাজিল্লকপগা লোয়ননা ঙাইহাক লৈতনা মৈতৈ খুঞ্জাশিংদা বোম অমসুং নোংমৈ কাপশীন্দুনা লান্দারক্লিবনি হায়না খুঞ্জাশিং না ফোঙদোক্নখি।