কুকি-জো কাঙলূপকি মীওইশিংনা নেমচা কিপগেনগী মায়োক্তা খোঙজঙ চঙশীনখ্রে, থাদৌ ইনপিগী মায়কৈদগীদি নেমচাবু থাগৎখ্রে

অনৌবা মীয়ামগী লৈঙাক অমা মনিপুরদা লাকখিবগা লোয়ননা য়ূম্নাম খেমচান্দ না লুচিংবা লৈঙাক অসীগী দিপ্যুটি চিফ মিনিষ্টর ওইনা হন্দক ভর্চুএল ওইনা ৱাশক লৌখিবদা ঙায়রিবা ৫০- কাংপোকপি কেন্দ্রগী এম এল এ নেমচা কিপগেন্না কুকি -জো মীয়ামদা নমথাক তৌরম্বা য়ানিংদে হায়বা খোল্লাউ কয়াগা লোয়ননা ঙরাং কুকি -জো কাঙলূপকি মীওই ৫০ রোম্না অকনবা প্রোটেষ্ট তৌদুনা খোঙজং চঙশীনখ্রে।
ন্যু দিল্লিদা লৈরিবা মনিপুর ভবন মমাঙদা মীওইশিং অদূনা খোল্লাউ কয়া লাউদুনা নেমচা কিপগেনবু চৈখি। হৌজিক হৌজিক নেমচা কিপগেন্ অসী ন্যু দিল্লিদা লৈবা মনিপুর ভবন্দা লৈরিবনি।হন্দক্কি মনিপুরগী হীঙশা অসীনা কুকি -জো ফূরূপকি মীওই কয়ামরুম শিহনখ্রে অদুগা মীওই কয়ানা ময়ূম -মকৈ লৈতদুনা রিলিফ কেম্পশিংদা ঙসীফাওবা লৈরি।সেপরেট এদমিনিষ্ট্রেসন দিমান্দ তৌরিবা কাঙলূপ অসীগী অপাম্বা করিনো খঙনা-খঙনা নেমচা কিপগেন্না মনিপুর লৈঙাক শেম্বদা দিপ্যুটি চিফ মিনিষ্টরগী ফম লৌরিবসি কুকি -জো মীয়ামদা চাউনা মীনম্বা অমনি হায়বা ৱাফমশিং ফোঙদোক্নখি।
নাকল অমরোমদা, থাদৌ ইনপি মনিপুরগী চেরোল অমদা, নেমচা কিপগেন্না মনিপুর লৈঙাক্তা শৌগত্তুনা দিপ্যুটি চিফ মিনিষ্টর ওইনা ৱাশক লৌখিবা অসী অচূম্বা খোঙথাঙনি হায়না থাগৎপা ফোঙদোরক্লি।মনিপুরদা কুকি কৌবা ট্রাইব অমত্তা লৈতে।এনি কুকি ট্রাইব (এ ক টি) হায়রিবা কাঙবূ অমা থোরক্লিবা অসীদি মপান্দগী আইন কায়না, মনিপুরদা লোন্না চঙশীল্লক্লগা লৈরিবা ফোরেন্নরশিংনি।মখোয়বু লৈঙাক্না মশক খঙদোকপগা লোয়ননা তকথোক্কদবনি।মখোয়গী অপূনবা মশীং অসী কুমশিং ২০১১ গী সেন্সস মতূঙ ইন্না ২৮,৩২৪ নি।মখোয়দি লমদম অসীগী মীওই নত্তে। নেমচাগুম্বা থাদৌ কাঙলূপকি সার্টিফিকেট পায়রিবী,মনিপুরগী য়েলহৌমী অমবু কুকি -জো কাঙলূপকি মীওই নি হায়না এ কে টিনা চিংশিন্ননবা লিলা শান্নরক্লিবা অসীদা মীয়ামগী লুচিংবী অমা ওইনা পঙথদুনা লৈফম থোক্তে হায়বা ৱাফম থাদৌ ইনপি মনিপুরগী চেরোল অসিদা ফোঙদোরক্লি।
কুকি -জো কাঙলূপকি লূপ খরনা সেপরেটিষ্ট পোলিটিকেল মূবমেন্ট শাগৎলিবা অসী ওইররোইদবা মঙলান্নি।মীরমদা লোন্না চঙশীল্লক্লগা চাকথূঙ ফংননবা তাৎ তৌরকপনি।নেমচা কিপগেন্না কুকি -জো ফূরূপকি তাৎ অসিদা পঙথবা তৌরোইদবনি, ঐখোয় পূম্নমক থাদৌনি হায়না চেরোল অসিদা থম্লক্লি।