কোকোমিনা লুচিংবা মনিপুর কনবা খোঙচৎ মীওই লাখ হেনবনা শরুক য়াদুনা পাঙথোকখ্রে, ৱারেপশিং লৌখ্রে

কোর্দিনেটিং কম্মিটি ওন মনিপুর ইন্টিগ্ৰিটি (কোকোমি) না লুচিংদুনা হৌখিবা জনুৱারি ৩১ দা ইম্ফালদা মীওই লাখ হেনবনা শরূক ‌য়ারদুনা মনিপুর কনবা খোঙচৎ পাঙথোকখ্রে।
হৌজিক মনিপুরদা তঙদূ-লৈতাদবা ফীভমশিং মায়োক্নরক্লিবা, ক্রোস-বোর্দর টেরর এত্তেকশিং চত্থরক্তুনা মনিপুরিশিংগী অপূনবা শক্তম অমদি লমদম অসীগী লমখৈ কায়হন্ননবা, কলচরেল,দেমোগ্ৰাফিক অমদি টেরিটোরিয়ল ইন্টিগ্ৰিটি মাঙহন্ননবা হোৎনরক্লিবা ময়াম অসিদা ইন্দিয়া লৈঙাক্না তূমীন্না য়েংবগুম ৱা অমত্তা ঙাঙদনা লৈরিবা, অদূগা মনিপুরদা লৈরিবা য়েলহৌমীশিং মূথৎনবা হোৎনরকপা ইন্দিয়া লৈঙাক্কী থৌওংশিংগী মথক্তা য়াম্না অকনবা মওংদা য়ানিংদবা ফোঙদোক্তুনা মীয়ামগী অচৌবা খোঙচৎ অদূ পাঙথোকখিবনি।
ইম্ফালগী ক্বাককৈথেলদা লৈরিবা তিদ্দিম গ্ৰাউন্দা চীঙ অমসুং তম্পাক্লমগী মায়কৈ কয়াদগী লাকখিবা মীওই লাখ হেনবনা শরুক য়াদুনা পূল্লবা মতূঙদা চত্থখিবা মনিপুর কনবা মীয়ামগী অচৌবা খোঙচৎ অদূ তিদ্দিম লম্বীদা লাক্লগা কৈশাম্পাৎ জঙ্কসন ফাওরক্তুনা ইম্ফালগী ৱাহেংবম লৈকায়রোমদা লাক্লবা মতূঙদা নাগামপাল লম্বীদা, কাঙলূপ কয়াগী মীয়াম য়াওশীল্লক্তুনা, মীয়ামগী অচৌবা মহাসাগর অমগা পাঙ্খক ওইরকখি। লম্বীদা চৎলম্বা মীওশিংসু খোঙচৎ অদূদা মথঙ মথঙ য়াওশীল্লক্তুনা লাকপনা মমৈথঙদা ইম্ফালগী থাংমৈবন্দা লৈবা থাউ গ্ৰাউন্দা থুংলখি। মফম অদুদা মীয়ামগী অচৌবা মীফম অমা পাঙথোকখিবগা লোয়ননা ৱারেপ কয়া অমত্তা ওইনা লৌখি।
ৱারেপশিং অদূগী মনূঙদা ইন্দিয়া লৈঙাক্না চিন-কুকি নার্কো টেরোরিষ্টশিংগা খূৎয়েক তৌনরিবা সস্পেন্সন ওফ ওপরেসন ( সূ) অসী খূদক্তা লৌথোক্তুনা কুকি টেরোরিষ্টশিংগী মথক্তা লৈবাক অসীগী লৈরিবা আইনগী মখাদা অকনবা থবক পায়খত্তুনা মখোয়বু লাকশীনগদবনি অমদি খ্বাইদগী অকনবা মখলগী চৈরাক পীগদবনি। মখোয়না হাৎনীংবা মতমদা মীচম হাৎপা, নেস্নেল হায়ৱেশিংদা মনীঙ তম্না খূৎলায় পায়দুনা মীয়ামদা অকিবা পীরিবা অমসুং মীয়াম চত্থোক-চৎশিন তৌবা য়াহন্দ্রিবসি খূদক্তা মীৎয়েং চঙদূনা চত্থোক-চৎশিন য়াহল্লু হায়বা ৱাফমশিং য়াওরি।
মনিপুরদা এন আর সি নত্রগা মসীগা মান্নবা মেকানিজম পায়খত্তুনা মীতোপ খন্দোক্কদবনি অদূগা মরমদমদা হলহনখিগদবনি।মীতোপশিং চঙশীল্লক্লগা ঙমখৈ পরীঙশিংদা শেমগৎ-শাগৎলক্লিবা ইনফ্রাষ্ট্রকচরশিং তকথোকখিগদবনি।মীয়ামগী খনবা, নুং-পান ফাওনা থবক তৌগদবা লৈঙাক অমা খূদক্তা থমগদবনি, মনিপুর মীয়ামগী হক মৎপা খূদক্তা লেপ্পু, কুকি টেরোরিষ্টশিংনা চত্থরক্লিবা ক্রোস-বোর্দর টেরর এত্তেকশিং ইন্দিয়া লৈঙাক্না মতীক চাবা পাউখুম পীদুনা তকখায়গদবনি অদুগা আই দি পিশিং মশা -মশাগী ময়ূমদা হঞ্জিলহল্লু লোয়ননা মখোয়দা সেক্যুরিটি মতীক চানা পীয়ু হায়বনচিংবা ৱারেপশিং লৌখি।