কোর্দিনেটিং কম্মিটি ওন মনিপুর ইন্টিগ্ৰিটি (কোকোমি) গী থৌপুবশিংগী মতম লোয়শিল্লকখিবগা লোয়ননা কুমশিং ২০২৫-২৬ কি ওইনা কম্মিটি অসিগী থৌ পুগদবা মীওইশিং খনখ্রে। লোয়ননা ঙরাং ৱাশক লৌবগী থৌরম অমা লম্ফেলদা লৈবা লূপ অসীগী ময়ায় লোয়শঙদা পাঙথোকখ্রে। ঐখোয়গী পোলিটিসিয়ানশিং অমসুং সি এস ওশিংগী লুচিংবশিংনা মথৌ নীঙথীনা মশক খঙনা তৌদবদগী, দাইত্য মশক খঙনা থবক পায়খত্তবদগী মনিপুরদা হীঙশাগী ঈরাং অসী লোইশিনবা ঙমদ্রিবনি হায়না ঙরাং ৱাশক লৌবগী থৌরম অদুদা কোকোমিগী কোর্দিনেটর ওইনা থৌ পুরম্বা, হৌজিক্না মহাক্কি মতম লোইশিল্লক্লবা থোকচোম সোমোরেন্দ্রনা ফোঙদোকখ্রে।
ৱাশক লৌবগী থৌরম অদুদা ইন্টর্নেস্নেল পিস এন্দ সোসিয়েল এদভান্সমেন্ট ( ইপসা) গী ৱার্কিং প্রসিদেন্ট ওইনসু থৌ পুরিবা খূরায়জম অথৌবনা কোকোমিগী অনৌবা টার্মগী কোর্দিনেটর, এসিষ্টেন্ট কোর্দিনেটর ফাইনান্স ওইনা য়ূমখায়বম সুর্জিটকুমার খূমন, এসিষ্টেন্ট কোর্দিনেটর পব্লিসিটি ওইনা খূরায়জম জয়েন্টা, য়েঙ্কোকপম ধিরেন্না এসিষ্টেন্ট কোর্দিনেটর ওরগনাইজেসন, জেনরেল এদমিনিষ্ট্রেসন সেক্রেটরি ওইনা ফিজম শ্যামচান্দ, একজিক্যুটিব মেম্বরশিং ওইনা সঞ্জিৎ সোরাইসম, লাইশ্রম রোমেশ, কে এস ঐচ রোমেশ, ৱারেপ্পম সেকেন্দ অমসুং ময়েংবম ধনঞ্জোই খনখি। অরী-অনৌ শিন্নবগী থৌরমদুদা সি এস ও শিংদগী লাকপা লুচিংবা কয়াসু শরুক য়াখি।