মমাঙ চহী ২০২৪ গী অরোয়বা দিসেম্বর থাগী ১৪ দা থৌবাল দিষ্ট্রিক্ট মনূংচন্না লৈরিবা সল্লুংফম হায় স্কুল মনাক্তা থৌবাল দিষ্ট্রিক্ট পুলিস কম্মান্দো খূৎপূ অমনা খুল ঙাকপা ভিল্লেজ ভল্লন্টিয়র অমা নোংমৈনা কাপ্তুনা হাৎখিবগা লোয়ননা অতোপ্পা ভিল্লেজ ভল্লন্টিয়র ৬ ফাদুনা পুখ্রগা ঙসীফাওবা থাদোরক্তবগী থৌওংশিং কন্না য়ানিংদবা ফোঙদোক্তুনা মনিপুর তম্পাক্কি মফমশিং শীনবা থুংনা মৈরা পায়বী ঈমাশিংনা পাক-সন্না খোঙজঙ চঙশীল্লকপা লেপ্পা লৈত্রি।
খোঙজঙশিং অসীগী মখা তারকপা ওইনা থা অসীগী ২৭ তসু মফম কয়াদা ঈমাশিংনা পাক-সন্না খোঙজঙ চঙশীনখ্রে। বিষ্ণুপুর দিষ্ট্রিক্ট মনূংচন্না লৈরিবা থাঙ্গ কেন্দ্রগী থাঙ্গ সেন্দ্রা স্পোর্টস হাওস মনাক্তা সেন্দ্রা লৈকায়গী ঈমা মৈরা পায়বী লূপ্না শীন্দুনা খুল ঙাকপা ভিল্লেজ ভল্লন্টিয়র অমা নোংমৈনা কাপ্তুনা হাৎখিবা থৌদোক্তা চেন্নরিবা পুলিশ কম্মান্দোশিং আইনগী মতূংইন্না মতীকচাবা চৈরাক পীগদবনি, মখোয়বু থবক্তগী পূম্লৌ লৌথোক্কদবনি, ফাজীনখিবা ভিল্লেজ ভল্লন্টিয়র ৬ কন্দীসন অমত্তা য়াওদনা খূদক্তা থাদোক্কদবনি হায়বা অকনবা দিমান্দ তৌদুনা খোঙজঙ চঙশীনখ্রে।
মনিপুরদগী আর্ম ফোর্সেস স্পেসিয়েল পৱার্স এক্ট, ১৯৫৮ খূদক্তা পূম্লৌ লৌথোক্কদবনি হায়বা খোল্লাউ কয়াসু ঈমাশিংনা লাউখি। চপ মান্নবা মওংদা ইম্ফাল ইষ্ট দিষ্ট্রিক্ট মনূংচন্না লৈরিবা কোংবা মখা নান্দৈবম লৈকায় লাই মোরিবা কম্যুনিটি হোলদসু লমদম অসোমগী ঈমা মৈরা পায়বী শিংনা ৱাকৎ মীফম চত্থদূনা খুল ঙাকপা ভিল্লেজ ভল্লন্টিয়র অমা নোংমৈনা কাপ্তুনা হাৎখিবা অমসুং অতোপ্পা ভিল্লেজ ভল্লন্টিয়র ৬ ফাজিনখিবগী মায়োক্তা অকনবা প্রোটেষ্ট তৌখি।