কমলবাবুগী লংলা-লংজিন খঙহন্দবগী মায়োক্তা মীয়াম্না লম্বী থিংদুনা আর্মি চৎহল্লোইদৌরি

লৈমখোং আর্মি কেম্প মনূংদা থবক শুবা চৎখিবদগী থিবা খঙদনা ঙসিফাওবা লৈরিবা আসামগী কছার দিষ্ট্রিক্ট তগী, হৌজিক্না ইম্ফাল ৱেষ্ট দিষ্ট্রিক্টকি লোইতাং খূনৌদা লৈবা লাইশ্রম কমলবাবুগী অশেংবা লংলা-লংজিন পুথোকউ হায়না অকনবা দিমান্দ তৌবা লেপ্তরি। মহাক মাঙখিবগা মরী লৈননা শেমখিবা জোইন্ট এক্সন কম্মিটি (জে এ সি) না শীন্দুনা লৈমখোংদা লৈরিবা ৫৭ শুবা ইন্ডিয়ান আর্মীগী মাউন্টেন দিবিজন কেম্প মমাঙদা অকনবা প্রোটেষ্ট চত্থবগী খোঙজঙ লেপ্পা লৈত্রি।

কমলবাবুগী অশেংবা লংলা-লংজিন পুথোকপা ঙমদ্রিফাওবা ঙসিদগী কান্তো সাবল অমসুং সেকমাই লম্বীশিংদা ইন্দিয়ান আর্মী অমসুং মখোয়গী গারিশিং চৎপা থিংলগনি হায়না কমলবাবুগী জে এ সিনা অকনবা ৱাফম ফোঙদোকখ্রে। ইন্দিয়ান আর্মীদা মনিপুরগী মীয়াম্না মমাঙদগী হৌনা থাজবা কয়া থমদুনা লাক্লি। আসাম রাইফলস তা মতম অমদা মীয়াম্না অচেৎপা থাজবা থম্লম্লবসু মমাঙ চহীগী মে থাদগী চিন-কুকি-নার্কো টেরোরিষ্ট শিংনা চত্থরক্লিবা হীংশাগী ঈরাং অসীগী হৌরকফম ময়েক শেংনা খঙলিবা আসাম রাইফলস ফোর্স অসীনা কুকি টেরোরিষ্ট শিংদা তোংশিন্দুনা মীচঙ চঙবগী থৌওং কয়া চত্থরকপদগী মনিপুরগী মীয়াম্না মখোয়দা মহৌশা থম্লম্বা থাজবা পূম্বা ঙসীদি মশানা মাঙহনখ্রে।

মসীগা মান্ননা হন্দক্কি কমলবাবুগী থৌদোক অসীদগী মীয়াম্না ইন্দিয়ান আর্মীদা থাজবা মাঙশীল্লক্লে হায়না জে এ সি অসীনা ফোঙদোকখি। লৈমখোং চীঙমাঙদা পাঙথোকখিবা পাউগী মীফম অমদা জে এ সি অসীগী স্পোক্স পার্সন মোইরাংচা ইবোনা ৱাফম অসী ফোঙদোকখিবনি। হৌখিবা নবেম্বর ২৫ দা লৈমখোং আর্মী কেম্পতা চঙখিবা কমলবাবু কদায়দা লোৎলিবগে হায়বদু জি ও সিনা মীয়ামদা খঙহল্লু হায়না মহাক্না অকনবা দিমান্দ তৌখি।