মনিপুরি মুস্লিমলক্তগী অহানবা আই পি এস ওফিসার অব্দুর রাহমান লৈখিদ্রে

মনিপুরগী মৈতৈ-পাঙল কম্যুনিটিগী ইহান হানবা আই পি এস ওফিসার ওইনা লৈরম্বা অলহাজ অব্দুর রাহমান হৌখিবা ফেব্রুয়ারি ১৫ গী নুমিদাংৱাইরম পূঙ ৫.৩০ তাবদা লৈখিদ্রে। মহাক ইম্ফাল ইষ্ট দিষ্ট্রিক্টকি পাঙ্গৈ রোদতা লৈবা কৌবাক হৌবীদা লৈবা মশাগী য়ূমদা লৈখিদবনি।মশীঙ য়াম্লবা, মনিপুর অমসুং অতৈ ষ্টেটশিংদগী লাকখিবা মুসলমানশিংনা শরুক য়াদুনা মহাক্কি জানাজা নমাজ পাঙথোকপগা লোয়ননা মীয়াম্না মপূঙ ফাবা ঈকায়খুম্নবা ঊৎলবা মতূঙদা অরোয়বা মথৌ-মঙম পাঙথোকখি।
লৈখিদ্রবা অলহাজ অব্দুর রাহমান অসী মনিপুরগী মৈতৈ-পাঙল্লক্তগী ইহান হান্না ইন্দিয়ান পুলিস সার্বিস (আই পি এস) ফংখিবা পুলিস ওফিসার অমা ওইখি।মহাক কুমশিং ১৯৭০ দগী ১৯৭৫ ফাওবদা ইম্ফাল কল্লেজদা কেমিষ্ট্রি দিপার্টমেন্ট তা এসিষ্টেন্ট প্রোফেসার ওইনা লৈরম্লবা মতূঙদা কুমশিং ১৯৭৫ কি মার্চ ৩১ দা মনিপুর পুলিস সার্বিস (এম পি এস) কি এপ্পোইন্টমেন্ট ফংলদুনা পুলিস ওফিসার অমা ওইনা থবক তৌরকখি।মহাক্না ফুংয়ার, মোরেনচিংবগী এস দি পি ও ওইনা থৌ পুরমখি।মহাক মঙাশুবা মনিপুর রাইফল্স কি এসিষ্টেন্ট কম্মানদেন্ট ওইনসু মতম শাংনা থৌ পুরকখ্রবা মতূঙদা কুমশিং ১৯৮০ দা দিপ্যুটি কম্মানদেন্ট ওইনা প্রমোসন ফংখি।
কুমশিং ১৯৮১ দা ৫৯ শুবা মাউন্টেন ব্রিগেট (আর্মী) দা দিপ্যুটেসনদা লৈরুরবা মতূঙদা এদ্দিস্নেল এস পি ওইনা প্রমোসন কারকখি। কুমশিং ১৯৮৪ দা ৬ শুবা এম আরগী কম্মান্দেন্ট ওইখি। কুমশিং ১৯৮৫ দা আই পি এস ফংখি।মহাক মতম শাংনা লৈঙাক্কি থবক পুরম্লবা মতূঙদা আই জি পি ওইনা থবক্তগী পোত্থাখিবা মথৌ মশক খঙবা অমসুং মপুন্সি চূপ্পদা মতম মাঙহন্দনা থবক তৌখিবা ফিদম্নিণায় ওইরবা মীশক অমনি।