ইম্মিগ্ৰেন্ট কুকি মিলিটেন্টশিংগা পোলিটিকেল দাইলোগ তৌনবগী মথৌ তাদে, মিলিটরি ক্রেক দাউন চত্থগদবনি হায়না মাহেশ্বরনা গভর্নরদা তকশীনখ্রে

রিপব্লিকান পার্টি ওফ ইন্দিয়া (আর পি আই) অথৱালে গী নেস্নেল সেক্রেটরি মাহেশ্বর থৌনাউজম্না লুচিংবা পার্টি অসীগী টিম অমনা ঙরাং ইম্ফালগী রাজ ভবন্দা চত্তুনা মনিপুরগী অনৌবা গভর্নর অজয় কুমার ভাল্লাগা উনদুনা হৌজিক ষ্টেট অসীদা মায়োক্নদুনা লৈরিবা, চহী অনী ফাজীল্লক্কদৌরবা হীঙশাগী ঈরাং অসী লোইশিনবা য়াননবগী সজেসন কয়ামরুম পীরম্লে।

গভর্নরগা উনরুরবা মতূঙদা আর পি আইগী নেস্নেল সেক্রেটরি মাহেশ্বর না রাজ ভবনগী গেট মমাঙদা পাউমীশিংগা উনখিবা থৌরমদা হায়, মহাক অমসুং মহাক্কি টিম্না, য়ুনিয়ন হোম সেক্রেটরি ওইরম্বদগী হন্দক্তা নৌনা মনিপুরগী গভর্নর ওইরকখ্রবা অজয় কুমার ভাল্লাগা রাজ ভবন্দা উনখিবা অদুদা মনিপুরদা হৌজিক লৈরিবা হীঙশাগী ঈরাং অসী মপূঙফানা লোইশিন্ননবা অমত্তা ঙায়রবা পাম্বৈদি মপান লৈবাকশিংদগী মনিপুর/ ইন্দিয়াদা আইনগী ৱাংমদা লোঞ্জা-লোন্থূপ্ননা চঙশীল্লক্লিবা কুকি-চিন- নার্কো টেরোরিষ্টশিং অসীগা পোলিটিকেল দাইলোগ চত্থবদু নত্তে। কুকি অমসুং মখোয়গী মিলিটেন্টশিংগা পোলিটিকেল দাইলোগ চত্থবগী মথৌ অমত্তা তাদে। টেরোরিষ্ট শিংগা অমসুং ফোরেন ইম্মিগ্ৰেন্টশিংগা মতৌ করম্না পোলিটিকেল দাইলোগ চত্থগদৌরিবনো, মখোয়বু সেক্যুরিটি মিজরশিং লৌখত্তুনা ক্রেকদাওন তৌগদবনি। মতমদুখক্তদা হৌজিক লৈরিবা হীঙশাগী ঈরাং অসী নমথগদবনি হায়না ফোঙদোক্লম্লে হায়না মহাক্না পাউদমখি।

মনিপুরদগী ফ্রী মূভমেন্ট রিজিম ( এফ এম আর) লৌথোক্কদবনি, কুকি মিলিসটেন্টশিংগা সাইন তৌনরিবা সস্পেন্সন ওফ ওপরেসন (সূ) খূদক্তা লৌথোকপগা লোয়ননা ম্যান্মারগা ইন্দিয়াগা তাইনরিবা ঙমখৈ পরীং মপূঙফানা ফেন্সিং তৌরবা মতূঙদা মবূক শেংবা সেন্ট্রেল সেক্যুরিটি ফোর্স না ঙমখৈ অসী ঙাক্লবা মতমদা ঈরাং অসী লোইশিনবা ঙমগনি হায়না মহাক্না ফোঙদোকখি হায়রি।