হৌজিক ঐখোয়না উবা ফংলক্লিবা শক্তমশিং অসী অতৈ করিসু নত্তে, মৈতৈ মূত্থৎনবা, তুম্না মাঙহন্ননবা লাল্লোংনি:আর কে সনায়াইমা

ইন্দিয়ানা মনিপুর থুগাইনবা মতম কয়াগী মমাঙদগী শরৌ-লাং থাক্তুনা লাক্লি। মদূ ঙসীদি থবক ওইনা পাঙথোকপা হৌরক্লি হায়বসি ঐখোয়না হৌখিবা চহী খরগী মতমসিদা তরং-তরংনা উবা ফংলক্লি। অসীগুম্বা চৈরকশিদা কুকি- মিলিটেন্টশিংনা হন্দক মরক মৈতৈদা খূৎ থাবা লেপখ্রিবসি কনাগী থৌইন্সিন্নো হায়বদুসু ঐখোয় পূন্না খঙমিন্নবা মথৌ তারি। হোংলক্লিবা ফিভমশিং অসি অফবা খূদম অমত্তা নত্তে হায়বসি ঐখোয়না খঙমিন্নগদবনি। তাঞ্জা অসী য়ৌরক্লফাওবদা ঐখোয় মশেল পূন্সীন্নদুনা ঈশাগী তুংলমচৎকি পোরম অমা য়াৎচনবা ৱারেপ লৌবা ঙমহৌদ্রবদি ঐখোয় অমত্তা হিংহৌররোই, পূল্লপ লূপমীন্নখ্রগনি হায়না য়ু এন এল এফকি হান্নগী চ্যেরমেন রাজকুমার সনায়ায়মনা ফোঙদোকখ্রে।

ইম্ফাল ইষ্ট দিষ্ট্রিক্টকি মনূঙচন্না খূরায় নান্দৈবম লৈকায়দা মীয়ামগী লুচিংবা অরাম্বম সমরেন্দ্রনা পুন্সিগী অরোয়বা য়াহিপ তানখিবা সোসিয়েল ষ্টেন্দর্দ ক্লব (এস এস সি) গ্ৰাউন্দ দা লৈবা অরাম্বম সমরেন্দ্রগী নীঙশীঙ খুভমদা ঙরাং পাঙথোকখিবা অথৌবা অসী লৈখিদবগী ২৫ শুবা চহীগী কুমওন থৌরমদা ৱা ঙাঙবদা আর কে মেঘেন্না ৱাফম অসী ফোঙদোরকখিবনি।

অরাম্বম সমরেন্দ্রগী নীঙশীঙ খুভমদা মহাক্না লৈ-শু কত্তুনা ঈকায়খুম্নবা ঊৎখিবগা লোয়ননা মৈতৈ মশেল মরক্তা তোখাই তাননবা, মূক্নরকপগী ফীভম লাক্নবা ইন্দিয়ানা হোৎনরক্লিবসী ঐখোয় খঙমিন্নগদবনি হায়খি। কুকি- মৈতৈ হাৎনহল্লিবা, এম এস টি গারিদা মনিপুর হায়না থাবা ৱাহৈ মূত্থৎলু হায়বা ঙম্লক্লিবসি কনা করি মরমগীদমক হায়হল্লিবনো হায়বসি খঙমীন্ন বা চঙই। মহার রেজিমেন্টকি করিসু লৈতবা জৱান খরনা তেনৱা মরোলদৌনা ৱাফমদু করম্না হায়রক্কদৌরিবনো হায়না মহাক্না ফোঙদোকখি।