হান্নগী সি এম বিরেনগী ওদিও রেকোর্দকি মতাঙদা ফোরেন্সিক রিপোর্ট পীখৎলক্তবগীদমক সুপ্রিম কোর্ট মৈ হৌনা শাউখ্রে

হৌখিবা চহী অমা মখায়গী মমাঙদা মতমদুগী মনিপুরগী চিফ মিনিষ্টর ওইরম্বা নোংথোম্বম বিরেনগী ওইগনি হায়বা, মশাগী মহৌশাগী খোঞ্জেলগা চপ মান্নবা খোঞ্জেল অমনা হৌজিক মনিপুরদা থোক্লিবা হীঙশাগী ঈরাং অসী চিফ মিনিষ্টর মশামক্না মাষ্টরমাইন ওইরগা চত্থহনখিবনি হায়বা ওদিও রেকোর্দিং ক্লিপ অমা সোসিয়েল মেদিয়া রিপোর্ট তা থাদোরকখিবা অদূ  সুপ্রিম কোর্ট তা থিজিনবিনবা অমসুং মরাল লৈবা মীওই চৈরাক পীবীয়ু হায়না থাঙ্গৎলকখিবা কমপ্লেন্ট পেটিসন অমা হৌজিক ফোঙ-ফোঙ শাদুনা লৈরি।

কমপ্লেন্ট অদূদা য়াওরিবা, হান্নগী সি এম বিরেনগীনি হায়রিবা খোঞ্জেল অদূ কদায়ফাওবা চুম্লিবনো হায়বদুগী মতাঙদা চপচাবা অমা খঙদোক্ননবা পান্দমদা লৈবাক অসীগী খ্বাইদগী মকোকথোংবা ৱায়েল লোয়শঙ ওইনা লৈরিবা সুপ্রিম কোর্টনা ফোরেন্সিক সাইন্স লেবোরেটরিগী রিপোর্ট কৌখিবা থা অহূম হেঞ্জিল্লক্লবা মতমসিফাওবদা মরী লৈনবা অথোরিটিনা এপেক্স কোর্ট অসীদা পাউখুম পীরকখিদবদা কোর্ট অসীনা খম থেংনা অশাওবা ফোঙদোকখ্রে।

নোংথোম্বম বিরেনগী খোঞ্জেলনি হায়রিবা ওদিও রেকোর্দ অদূ কুকি ওরগনাইজেসন ফোর হ্যুমেন রাইটস ট্রষ্ট কৌবা লূপ অমনা কমপ্লেন্ট থাঙ্গৎলক্তুনা থিগৎপীননবা সুপ্রিম কোর্ট তা হায়জরকপদগী এপেক্স কোর্ট অসীনা হ্যেরিং চত্থরকখিবনি। হৌখিবা মার্চ থাদা পাউখুম পীরক্ননবা খঙহনখ্রবসু ঙসীফাওবা রিপোর্ট অমত্তা পীরক্ট্রি। মতমসি মখাতানা কয়াম কুইনা লৌখিগদবনো, এপেক্স কোর্ট অসীনা কয়াম কুইনা ঙাইখো হায়বনো হায়না সুপ্রিম কোর্ট কি জষ্টিস সঞ্জিব খান্না অমসুং জষ্টিস সঞ্জয় কুমারগী দব্বল বেঞ্চনা অশাওবগা লোয়ননা ফোঙদোকখিবনি।