হন্দক চহী অসীগী চাক্কৌবগা মরী লৈননা সুরচন্দ্রনা পেঙবা, খাবক কেজিদা লূপা ৬০০ খক্তদা ফংহনগদৌরি

ইম্ফাল ৱেষ্ট দিষ্ট্রিক্টকি হিয়াংথাংদা লৈরিবা এস তোম্বা এন্দ সন্স ইন্টিগ্রেটেড ফিশ ফার্মিং (পেঙবা ফার্ম) না হন্দক্কি চহী অসীগী ওইনা লাক্লিবা নবেম্বর অহুমদা পাঙথোক্কদৌরিবা মৈতৈ ফূরূপকি খ্বাইদগী চাউবা অমসুং মরুওইরবা কুহ্মৈ ওইরিবা নীঙোল চাক্কৌবা থৌরমগা মরী লৈননা হীয়াংথাংদা মনিপুরগী মহৌশাগী ঙা মখল অনী হায়বদি পেঙবা অমসুং খাবক হায়রিবা ঙা মখল অনী অসীখক্তগি ওইবা ঙাগী মেলা মহৌশাগুম পাঙথোক্ননবা শেম শাবা পূম্লোই লোইখ্রে।

থৌরাং অসীগা মরী লৈননা ফিশ ফার্ম অসীগী প্রোপ্রাইটর ওইরিবা সোয়বম সুরচন্দ্রনা ফোঙদোরকখিবা মতূংইন্না, হৌখিবা চহী অনীগী মতম হায়বদি কুমশিং ২০২২ অমসুং ২০২৩ দা মথঙশীৎনা কোবিদ-১৯ গী অকনবা লায়না-লাইচৎ লাকখিবা অমসুং কুকি- মিলিটেন্টশিংগী হীংশাগী ঈরাং মায়োক্নখিবনা মহাক্কি ফার্ম অসীনা মহৌশাগুম পেঙবা, খাবক্কি মেলা পাঙথোকপা ঙমখিদে। অদূম ওইনমক হন্দক্কি নিঙোল চাক্কৌবা থৌরম অসীগা মরী লৈননা নবেম্বর অনী অমসুং চাক্কৌবা নূমীৎ, নবেম্বর অহুমদা মেলা অসি পাঙথোক্তুনা রিলিফ কেম্প শিংদা লৈরিবা, শেন্থোক লৈজদবশিং অমসুং লায়রবা মীয়ামগী য়েংলগা পেঙবা অমসুং খাবক কেজি অমদা শুপ্নগী লূপা ৬০০ খক্তদা ফংহনগনি হায়খি।

খাবকশিং অসী ঙাতোন্দগী  মপূংফারবা খাবক ওল্লকপদা চহী ৩ লোম চঙই। হন্দক পুথোক্ক দৌরিবা খাবক অসী চহী মরি মপূঙফারবা ঙাক্তনি অদুগা পেঙবা অসীসু গ্ৰাম ৩০০ দগী ৫০০ ফাওবা লূম্লবা ঙাক্তনি হায়খি। সোয়বম সুরচন্দ্র অসী মায় পাক্লবা ঙাগী ফার্মর অমা ওইনা ইন্দিয়া লৈঙাক্না পীবা দা. হীরালাল চৌধুরি নেস্নেল বেষ্ট ফিশ ফার্মর গোল্ড মেদলসু ফংখ্রবনি। মহাক্না হন্দক্কি মেলা অসীদা পেঙবা কে জি ১৫০০ হেন্না অমসুং খাবক কেজি ৫০০ দগী তাদনা পুথোক্নবসু হোৎনরি হায়খি। অপাম্বা মীওইশিংনা মহাক্কি ফার্মদা লাক্ল গা হৌজিকমক লৌবসু য়ারগনি হায়খি।