চহী অসীগী মে ২০ দা ঊখ্রূলদা হৌদোকখিবা মঙাশুবা ষ্টেট লেভেল সিরুই লিলি ফেষ্টিভেলগী থৌরম কভর তৌনবগীদমক এম এস টি বস অমদা তোংদুনা ইম্ফালদগী চৎখিবা পাউমীশিংগী টিম অমবু ইম্ফাল ইষ্ট দিষ্ট্রিক্টকি মনূঙচন্না লৈরিবা গ্বালতাবি এরিয়াদা দ্যুটি তাদুনা লৈরম্বা মরীশুবা মহার রেজিমেন্ট কি কাঙবূ অমনা মরম চাদনা দিতেন তৌখিবগী মথক্তা বস অদুদা মনিপুর হায়না থারিবা ময়েক অদূ মুত্থৎকদবনি হায়না খঙহল্লকখিবা থৌওং অদূগী মতাঙদা ষ্টেট লৈঙাক্না এনক্বারি চত্থখিবগী রিপোর্ট হৌজিকফাওবা পাউমীশিং অমসুং মীয়ামদা ফোঙদোক্তনা অমসুং খঙহন্দনা লৈশিনখিবা অসীবু খম থেংনা পেন্দবা অমদি য়ানিংদবা ফোঙদোক্তুনা পাউমীশিংনা খোঙজঙ চঙশীন্দুনা ইম্ফালগী কৈশাম্পাৎ লৈমজম লৈকায়দা লৈরিবা য়াইফা থৌনি কম্যুনিটি হোলদা ৱাকৎ মীফম অমা চত্থখ্রে।
থৌদোক অদূ থোকখিবা নুমীৎ ৪৫ হেনখ্রবফাওবদা ষ্টেট লৈঙাক অসীনা চত্থখিবা এনক্বারি রিপোর্ট অদূগী ফাইন্দিং অদূ করি লৈরবগে, মরাল লৈরবশিংগী মথক্তা করি-করম্বা এক্সন লৌগদৌরি নত্রগা হৌজিকফাওবদা করি এক্সন লৌখৎপা হৌখ্রে হায়বগী মতাঙদা করিগুম্বা অমত্তা খঙহন্দনা তূমীন্না লৈশিনখিবগী মতাঙদা পাউমীশিংনা য়াম্না কন্না পেন্দবা ফোঙদোক্নখি।
অদুঙৈ কুমশিং ১৯৭৫ দা ইমর্জেন্সি থমখিবগী মতাঙদদি দেমোক্রেসি হাটিয়া পালন তৌরি অদূগা পাউমীশিংগী হক খোঙ্গাওনরিবা থৌদোক অসীবুদি নমশীন্দুনা, নাথৈননবা হোৎনরিবসি কৈদৌনুংদা য়াবা ঙম্লোই, ঙসী জুলাই ৮ ফাওবদা লৈঙাক্না চপচাবা অমা খঙহন্দ্রবদি পাউমীশিংনা মখা তাবা খোঙজঙ চঙশীন্ননবা শেম শাবা লোইরে হায়না ই জি এমগী প্রসিদেন্ট খোগেন্দ্র খোমদ্রাম্না ফোঙদোকখি