কংগ্ৰেস অমসুং বি জে পি অনীনা অমনা অমগী মায়োক্তা প্রোটেষ্ট তৌনরি

মনিপুরদা হৌজিক থোক্লিবা হীঙশাগী ঈরাঙ অসীগী মতাঙদা কংগ্ৰেস পার্টিনা মতীঙ থোক্না থবক তৌবা ঙমদ্রি, অদুগা লৈঙাক পায়রিবা বি জে পিসু তূমীন্না লৈশিল্লি হায়না মীয়াম্না ফোঙদোক্নবা কয়া লৈরি। ন্যু দিল্লিদা পোলিটিকেল পার্টি অনী অসীগী থৌমীশিং লম কোয়বদৌনা চৎলগা অমনা অমগী মথক্তা পেন্দবা ফোঙদোক্নরদুনা প্রোটেষ্ট রেল্লি চত্থনরি। য়ূ জি সিনা কন্দক তৌবা নীট এগজামগী ক্বেসন পেপর লিক ওইখিবগী মতাঙদা মহৈরোয়শিং অমদি অতৈ নহা কয়ানা পেন্দবা ফোঙদোক্তুনা রেল্লি চত্থরকপদা পুলিসনা কা হেনবা থৌওংশিং চত্থখি হায়বা ৱাহৌদা পেন্দবা অমসুং য়ানীংদবা ফোঙদোক্তুনা কংগ্ৰেস পার্টীগী লুচিংবা রাহুল গান্ধীনা মকোক চিংদুনা প্রাইম মিনিষ্টর নরেন্দ্র মোদিগী ওফিসিয়ল রেসিদেন্স গেট্টা প্রোটেষ্ট তৌখি।

লৈঙাক্কি মীহূৎ থাদুনা প্রোটেষ্ট অদূ তোকখিনবা হোৎনরবসু মহয় য়ানবা ঙমখিদে।মদূগী তুংদা কংগ্ৰেসকি রাহুল গান্ধী অমসুং সমাজৱাদি পার্টীগী লুচিংবা মীওই খরা পুলিসনা ফাগৎপা লৈখি। রাহূল গান্ধীবু দিল্লি পুলিসনা থাংদুনা অমসুং চিংদুনা পুরবা মতুঙদা ফাজীনখিবা থৌওং অদূবু কন্না য়ানিংদবা ফোঙদোক্তুনা ঙরাং মনিপুরদা এম পি সি সীগী লুচিংবশিংনা খোল্লাউ কয়াগা লোয়ননা অকনবা মওংদা প্রোটেষ্ট তৌখি। বি জে পি লৈঙাক্কি কা হেনবা থৌওংশিংনি হায়না মরাল শীরদুনা চত্থখিবা প্রোটেষ্ট রেল্লি অদুদা মনিপুরগী হান্নগী চিফ মিনিষ্টর অমসুং হৌজিক্না এম পি সি সীগী প্রসিদেন্ট ওইনা লৈরিবা ওক্রম ইবোবি, এম এল এ ওইনা লৈরিবা কাঙুজম রঞ্জিৎ, টি ঐচ লোকেশ্বর য়াওনা মশীং য়াম্লবা কংগ্ৰেসকি থৌমীশিং শরূক য়াখি।

নাকল অমরোমদা, প্রাইম মিনিষ্টর নরেন্দ্র মোদিগী রেসিদেন্স মমাংদা কংগ্ৰেসকি লুচিংবা রাহুল গান্ধীনা লুচিংদুনা চত্থখিবা থৌওং কয়াদু য়ানিংদবা ফোঙদোক্তুনা বি জে পিগী থৌমীশিংনা ইম্ফালগী মরূওইবা মফমশিংদা কংগ্ৰেস মরূ ফংনা মূত্থৎলসি হায়বা খোল্লাউগা লোয়ননা ঙরাং রেল্লি চৎখি।