চীংনু হাওকিপ সাইক্যেত্রিক ৱার্দতা অরুবা ফীভমদা লায়কন্নদুনা লৈরি

চৎলিবা অনৌবা চহী ২০২৬ কি অহৌবা থা ওইরিবা জনুৱারীগী ২১ দা শকখঙদবা খূৎলায় পায়বশিংনা তমথীনা ওৎ-নৈরবা মতূঙদা মীহাৎ থীনা, নোংমৈনা কাপ্তুনা হাত্তোকপিখ্রবা ককচীঙ খূনৌ উচান মখোঙদগী ময়াংলম্বম রিষিকান্তগী পার্টনর ওইরম্বি, চুরাচান্দপুর দিষ্ট্রিক্টকি তুইবোং খুলদগী কুকি-জো কাঙলূপকি নিঙোল চিংনু হাওকিপ হৌজিক য়াম্না অরুবা ফীভম অমদা লায়কন্নরদুনা লৈরি।
দি প্রিন্ট না পীরকখিবা পাউগী মতূঙ ইন্না, মূক্নরিবা মৈতৈ অমসুং কুকি -জো কাঙলূপ অনীমক্কি মীওইশিংদগী তোখাই তানা লৈরবী চিংনু হাওকিপ অসি হৌজিক চুরাচান্দপুর দিষ্ট্রিক্টকি হোস্পিটালগী সাইক্যেত্রিক ৱার্দতা অরুবা ফীভমদা দাক্তরশিংনা লায়কন্নদুনা লৈরি। চোইরোল-পারোল অমদি ইমূঙ-মনূঙগী মীওইশিংনা খঙবা ঙমদবা ৱাফমশিং ঙাইহাক লৈতনা মচীন্দা মূরূম-মূরূম শোন্দুনা লৈবগী মথক্তা মঙোন্দা পীজ-পীথক তৌবা চীঞ্জাক পূম্নমকসু তত্তনা ওথোরক্লি হায়রি। মহাক হৌজিক এক্যুট দিপ্রেসন মায়োক্নদুনা লৈরিবা মরম্না মপূঙফানা ফীভম অসিদগী ফগৎহন্নবা হোৎনবদা মতম খরা হেন্না চঙখিগনি হায়না মহাকপু লাইয়েংলিবা দাক্তরশিংনা ফোঙদোরকখি।
মহাক্কি পার্টনর ময়াংলম্বম রিষিকান্ত বু খূৎলায় পায়বশিংনা ফাদুনা পুখ্রবা মতূঙদা নোংমৈনা কাপতুনা হাৎখিবা থৌদোক অদুদগী মহাক্কী ফীভম অসী মহৌশাদগী তোঙানবা অমা ওইনা ঙাওচৎনবা হৌরকখিবদগী হৌজিক ওইরিবা থাক অসী য়ৌরকখিবনি হায়না ঈমূঙ-মনূঙগী মীওইশিংনা ফোঙদোকখি।
চিংনু হাওকিপ অসি হোস্পিটালগী ফমূঙদা তাদুনা,ময়েক শেংনা ৱা অমত্তা ঙাঙথোকপা ঙমদনা লৈরি । রিষিকান্তগী থৱায় য়াওদ্রবা হকচাং অদূ মহাক্না মহাক্কি তুইবোং খুলদা লৈরোন চনবিনবা ঈমূঙ-মনূঙগী মীওইশিংদা য়াম্না কন্না হায়জখি অদূবু পুলিসনা য়াদবদগী মহাক অমূক হেন্না নীঙবা কায়খি হায়না মহাকপু হোস্পিটালদা সেবা তৌরিবী মচে অমনা ফোঙদোকখি।