চৎলিবা ফেব্রুয়ারি থা অসিগী মঙাদা তোঙান তোঙানবা চার্টর ফ্লাইটশিংদা য়ু পিদা পাঙথোক্লিবা কুম্ভ মেলাগী স্পোর্টস মিট হৌদোকপদা শরুক য়ারুনবা ইম্ফাল থাদোক্নখিবা মনিপুরগী চিফ মিনিষ্টর অমসুং লৈঙাক অসীগী মিনিষ্টর অমদি এম এল এ খরা অদূ দিল্লি য়ৌরবা মতূঙদা য়ু পিগী ত্রিবেনি সঙ্গমদা ঈরুপ্তুনা মেলা অসিদা মপূঙফানা শরুক য়াখ্রে। কুম্ভ মেলাগী ট্রেদিস্নেল স্পোর্টস মিট হৌদোকখিবা থৌরমদা অথোয়বা মীথূঙলেন ওইনা চিফ মিনিষ্টর বিরেন শরূক য়াখি। থৌরমদুদা ৱা ঙাঙবদা মহাক্না মনিপুরগী তোমথিন ওইনা লৈজরিবা ট্রেদিস্নেল স্পোর্টস, আর্টস অমসুং কলচরগী মতাঙদা ৱাফম কয়া ফোঙদোক্তুনা তাঙনা ফংখিবা মালেম পূম্বদগী লাকখিবা মীয়াম তিনবা থৌরম অদূদা লমদমসিগী ফজরবা কলচর, নাৎ অমদি শক্তম মালেম পূম্বদা শন্দোকপা ঙমখ্রে।
ইন্দিয়া অসী অচৌবা ঈমূঙ অমগুম্বনি। তোঙান তোঙানবা নাৎ, লোল, কলচর, চৎনবী, ফিজেৎ চাকচা লৈজরবসু লৈকোল অমদা মখল- মথেলগী হৈরাঙ-লৈরাংশিংনা ফূগায়না শাৎকায়রকপদা মীৎফম হোংবা য়াদনা চীঙ লেম্না ফজরবা লৈকোল অদূগা পাঙ্খক্নি, ঐখোয়না ঈমা লৈবাক অসীগী য়ুনিটি অমসুং ইন্টিগ্ৰিটি কৈদৌনূংদা কায়হন্দনবা পূন্না হোৎনমিন্নগদবনি হায়না চিফ মিনিষ্টর না থৌরমদূদা ফোঙদোক্লদুনা মীয়ামগী পূক্নিং চিংশিনখি।
চিফ মিনিষ্টর অমসুং মহাক্কি টিম ঙরাং মচীৎ মচীৎ ওইনা ইম্ফালদা হল্লকখ্রে হায়রি।তোঙান তোঙানবা মেদিয়া আউটলেটশিংনদি চিফ মিনিষ্টর অমসুং মহাক্কি মিনিষ্টর, এম এল এ খরনা চৎখিবা খোঙচৎ অদূ বি জে পি মনূঙদা য়ানদবগী, চিংখাইনরকপগী থৌওং অমনি, সেন্টরগী লুচিংবশিংনা কৌরকপদগী চৎপনি হায়না লান্না শন্দোক্তুনা মীয়াম্বু অরানবা মায়কৈ অমরোমদা পুননবা হোৎনখিবসু য়াওদবা নত্তে হায়রি।