হৌখিবা কুমশিং ২০২৩ গী মে অহূমদগী হৌরকখিবা মৈতৈ-কুকি কম্যুনিটি অনীগী মরক্তা লৈরিবা হীঙশাগী ঈরাঙ অসীগী চৈরক্তা ইহান হানবা, শীংথানীংঙাই ওইবা খোঙথাঙ ওইনা মনিপুরগী নৌনা চিফ মিনিষ্টর ওইরক্লবা য়ূম্নাম খেমচান্দনা চাকলেন অমা শীনখ্রে। কম্যুনিটি খূদীঙমক অমত্তা ওইনা পূন্দুনা চামিন্নখিবা চাক্লেন অদূ, কাঙলূপকি ঈরাং অসী থোক্লকখিবা মতূঙদা ইহান হানবা, শীংথানীংঙাই ওইবা অমদি পুৱারি ওইরগদবা খোঙথাং অমনি। লমদমসিদা য়েলহৌঙৈদগী লৈরক্লবা ফূরূপচাশিংনা ঐখোয় মশেল কৈদৌনূংদা শেত্তোক্নবা খাইদোক্নবা য়াররোইদবনি, ঈচীল-ঈনাওনি হায়বসি খঙনৈ।
নুংশি-চান্ননা, শান্তি ওইনা লৈমিন্নবসু কাঙলূপ খূদীংমক্না পাম্মি। হৌজিক ফূরূপশিংগী মরক্তা থাজনদবগী মতৌ অমা লৈরিবসি কোকহনবা হায়বসি তঙায়ফদবা অমনি। থাজনদবা, নুংশিনদবা পূম্নমক কোকহল্লবা মতূঙদা মহৌশাগী ঈং-তপ্পা শক্তম অদু হঞ্জিল্লক্নবা থবক পায়খৎপা হায়বসি ষ্টেট লৈঙাক্কি অহানবা পান্দম্নি।পান্দম অসীমক ফংনবা মহাক্কী লৈঙাক্না অকনবা খোঙথাঙ লৌখৎলি হায়না জিরীবাম দিষ্ট্রিক্ট তা লৈবা, ইন্টর ষ্টেট ট্রক টার্মিনস শাগদৌরিবা মফমদূ য়েংশিনখিবা থৌরম অমদা চিফ মিনিষ্টরনা পাউমীশিংদা ফোঙদোকখি।
জিরিবাম ফোরেষ্ট দিভিজন্না শীন্দুনা মফম অদুদা উ চারাশিং থাবগী থৌরম অমদসু চিফ মিনিষ্টরনা মহাক্কি খোঙবূশিংগা লোয়ননা শরূক য়াখি। মফম অদু, ষ্টেট লৈঙাক্কি প্লান্নিং দিপার্টমেন্ট কা তান্নরগা টুরিজমগা মরী লৈনবা অতৈ প্রোজেক্টশিংসু পায়খৎপা য়াগদ্রা হায়বদু য়েংশিল্লগনি হায়বা ৱাফম চিফ মিনিষ্টরনা থমখি। মহাক্না অসামগী উধার্বোন এসেমব্লি কন্সটিট্যুয়েন্সিদসু চঙশীন্দুনা, কন্সটিট্যুয়েন্সি অদুদা বি জে পিগী মীরেপ ওইরিবা রাজদিপ গোলাগী মীখলগী কেম্পেনদসু ৱা ঙাঙখি।